Уыцы рæстæгмæ ам схъомыл цалдæр фæлтæры
Октябрьскæйы сывæллæтты нывкæнынады скъолайыл сæххæст 50 азы. Уыцы рæстæгмæ ам схъомыл цалдæр фæлтæры. Рауагъдонтæй бирæтæ дарддæр сæ цард сбастой сфæлдыстадимæ. Бирæ азты хъæздыг традицитæ æххæстгæнгæйæ, скъолайы абон тырнынц ног бæрзæндтæм схизынмæ. Бæлвырддæр радзурдзæн Хъайтмазты Дзерассæ.
Октябрьскæйы нывкæнынады скъолайы ахуыргæнджытæ æвзарынц сывæллæтты куыстытæ радон равдыстмæ – ахуыргæнинæгтæ республикæйы цæрджыты æдзух зонгæ кæнынц се сфæлдыстадимæ. Педагогтæ бæлвырд зонынц, рæзгæ фæлтæры курдиат куыд раргом кæнын ис, уый. Сæ хъомыладон архайды фæрцы сывæллæттæм гуырын кæнынц аивадмæ уарзондзинад.
Æрæджы скъоламæ балхæдтой сæрмагонд пец керамикæ судзынæн – раздæр-иу сывæллæтты æлыгæй конд статуэткæтæ хъуыд зонгæ нывгæнджытæм судзын. Ныр рæзгæ фæлтæрæн сæ бон у сæ арæхстдзинад уæлдæр кæнын керамикæ кæныны хъуыддаджы. Скъолайы ис 6 къабазы – ныв, нывкæнынад, композици, аивæдты истори, æрмдæсныйад æмæ скульптурæ.
Ныртæккæ нывкæнынады скъолайы ахуыр кæны 106 сывæллоны, фæлæ ардæм кæй фæнды, уыдон сты дзæвгар фылдæр. Ахуыргæнинæгтæ æрбацæуынц æрмæст Октябрьскæйæ нæ, фæлæ æппæт Горæтгæрон районæй. Фыццаг бонæй скъолайы æвæрд æрцыд фидар бындур. Уый бæлвырд зоны раздæры директор Хъараты-Гусаты Эльзæ. Ацы скъолайы кусы, куы байгом, уæдæй фæстæмæ. 20 азы йын разамынд лæвæрдта. Абон дæр йæ зонындзинæдтæ не вгъау кæны кæстæртæн.
50 азмæ скъолайæн чысыл нæ бантыст. Абон педагогтæ æмæ ахуыргæнинæгтæ тырнынц ног бæрзæндтæм, бирæ азты традицитæ хъахъхъæнгæйæ.
