Горæтгæрон районы музыкалон скъолатæй дзы архайдта 50 зæрæггæнæджы. Се ппæт дæр уыдысты курдиатджын. Концертæн уыд не сфæлдыстадон къорд дæр.
Октябрыхъæуы музыкалон скъолайы æзонг зарæггæнджытæ сæхи фæлварынц аивады. Уыимæ, конкурсы архайынц æрмæст фидæны профессионалтæ нæ, фæлæ йæ зæрдæйы фæндонмæ гæсгæ чи зары, ахæмтæ дæр.
Есиаты Тамарæ ацы конкурсмæ йæхи æнæрынцойæ цæттæ кодта. Зарыд иу скъоламæ фæндагыл, хæдзары, стæй сусæгæй урокты рæстæг дæр. Конкурсы Тамара архайы фыццаг хатт, æмæ сценæмæ рацæуынмæ æнхъæлмæ кæсы уæлдай цымыдисагдæрæй.
Есиаты Тамарæ, конкурсы архайæг: «Мæ зæрдæмæ цæуы зарын. Æз фыццаг хатт архайын конкурсы æмæ хъуамæ рамбулон».
Есиаты Тамарæйы хуызон æвзонг зарæггæнджытæ музыкалон скъоламæ æрæмбырд 50. Конкурс аразджытæ æмæ жюрийы уæнгтæ куыд зæгъынц, афтæмæй афæдзæй-афæдзмæ сæ курдиат æргом кæны ирддæрæй.
Илаты Николас, конкурсы архайæг: «Æз фыццаг хатт архайын. Æмæ мæ фæнды фыццаг бынат бацахсын, тынг уарзын зарын».
Конкурсы уыди 2 номинацийы – эстрадон æмæ академион вокал. Чызджытæ æмæ лæппутæ равдыстой хорз музыкалон цæттæдзинад. Мидисджын уыд сæ репертуар дæр. Залы зæлыдысты уырыссаг адæмон, нырыккон æмæ классикон уацмыстæ. Æнæмæнг уыди ирон авторы зарæг азарын. Конкурсанттæ иууылдæр сарæхстысты хорз.
Бестауты Дианæ, оперæ æмæ балеты театры зарæггæнæг, жюрийы уæнг: «Конкурсмæ æз мæ хъус дарын фæстаг 3-4 азы. Конкурсæн йæ профессионалон æмвæзад рæзы. Рæзы нæ кæстæрты тырнындзинад зарынмæ. Конкурс нын лæвар кæны бирæ ног нæмттæ, бирæ ног стъалытæ æмæ нын нæ кæстæрты курдиат æргом кæны. Мах та, жюрийы уæнгтæ нæ куыст дарддæр кæндзыстæм, цæмæй конкурс цæра æмæ нын нæ зæрдæтæ рухс кæна».
Конкурсанттæй иу дæр æнæ лæварæй нæ баззад. Алкæмæн дæр радтой статуэткæ, æмæ кады гæххæт. Уæлахиздзаутæ та архайдзысты республикон конкурстæ «Ирыстоны стъалыты» æмæ «Малусæджы».
