Ольгинскæйы цæрджыты цалдæр азы цы фарста тыхсын кодта, уый лыггонд æрцыд. Хъæуы æххæстгонд цæуы федералон программæ «хъæуккаг дохтыр», æмæ дзы арæзт æрцыд ног амбулатори.
Ольгинскæйы цæрджыты цалдæр азы цы
фарста тыхсын кодта, уый лыггонд æрцыд. Хъæуы æххæстгонд цæуы федералон
программæ «хъæуккаг дохтыр», æмæ дзы арæзт æрцыд ног
амбулатори.
Ныр сæ цинæн кæрон нæй. Дохтыртæ куыд зæгъынц, афтæмæй сæм цæрджытæ цæуынц æрмæст сæ низты фæдыл нæ, фæлæ уазæгуаты дæр.
Райдзаст æмæ рухс агъуыстытæ, ног
кабинеттæ. Ольгинскæйы амбулаторийы кусджытæ ахæм уавæрты рагæй нæ
куыстой. Дыууæ къуырийы размæ дæр ма сæ кусæн бынæтты уыдысты бынæттон
культурæйы хæдзары. Раст ма-иу педиатр æмæ сылгоймæгты дохтыр бадтысты
иу кабинеты. Къулты бæсты та се хсæн гæххæттын ширмæтæ.
Кънататы Дзерассæ, хъæуы цæрæг: «Æз ацы
хъæуы райгуырдтæн æмæ йæ хорз хъуыды кæнын зæронд амбулатори дæр, цы
уавæрты æмæ дзы куыд куыстой, уый дæр. Уый фæстæ агъуыстыл арт куы
схæцыд, уый дæр хъæуы цæрджытæй бирæтæ хъуыды кæнынц. Ныр та алчидæр
ардæм цингæнæгæйæ цæуы. Ома, иууылдæр рынчын сты нæ зæгъын, фæлæ алкæй
дæр фæнды ног бæстыхай фенын, дохтыртимæ аныхас кæнын. Семæ базонгæ
кæнын. Уый та æхсызгон куыд нæу. Сæ фылдæр æрыгæттæ сты, худæндзаст,
рæсугъд. Мæнæ нæм дæндæгты дохтыр кæй фæзынд, уымæй та бынтон райы
зæрдæ. Никуы нæм уыд. Ныр та нæм уыдзæн. Æмæ уыцы хъуыддагыл чи
бацархайдта, уыдонæн стыр бузныг».
Хъæуы цæрджыты цинæн кæрон нæй. Дохтыртæ
дæр разы сты сæ ног уавæртæй: алы специалистæн дæр дзы ис хицæн
кабинет. Алыхуызон процедурæтæ кæнынæн – æппæт фадæттæ. Кабинеттæ ифтонг
сты æппæт хъæугæ кусæнгæрзтæй æмæ техникæйæ. Амбулаторийы байгом кодтой
боныгон стационар. Иу бонмæ та дохтырты бон балæггад кæнын у 30
адæймагæн. Бæлвырд фæткмæ гæсгæ ссæуынц сæрмагонд специалисттæ. Ахæм
уавæртæй та разы сты æмæ удæнцой исынц рынчынтæ дæр, дохтыртæ дæр.
Джидзæлаты Маринæ, хъæуы цæрæг «Æз тынг
разы дæн. Мæ зæрдæ райы. 3 сывæллоны мын ис æмæ рынчын дæр куыд нæ
кæнынц. Æмæ алы хатт дæр нæ дохтырмæ куы æрбацæуын, уæд дзы цингæнгæйæ
ацæуын. Кæд нырма æрыгон у, уæддæр бæрæг уæ йæ куыст кæй зоны æмæ йæ кæй
уарзы, уый. Тынг бузныг дзы дæн. Æмæ æрмæст уымæй нæ, иннæ дохтыртæ дæр
афтæ зæрдæхæлар сты».
Ольгинскæйы амбулатори аразын райдыдтой 5
азы размæ, раздæры бæстыхай куы басыгъд, уæд. Ныр амбулаторийы кусджытæ
лæггад кæнынц 3 000 адæймагæн. Цæрджытæн уæлдай æхсызгон уый у, æмæ
амбулаторийы кусын кæй райдыдтой æрыгон дохтыртæ. Федералон программæ
«хъæуккаг дохтыр» æххæстгæнгæйæ, хъæуы ис терапевт, педиатр æмæ
стоматолог. Хицауады рдыгæй сæн цæуы алывæрсыг æххуыс. Алкæмæн дæр сæ
радих кодтой фæйнæ милуан сомы. Уый та сын уæлдай æххуыс у. Фæлæ сæ
домæнтæм гæсгæ алчидæр хъæуы 5 азæй къаддæр хъуамæ ма бакуса.
