Парк аив кæныны куыстыты фыццаг къæпхæны уал дзы сæвæрдтой 13 аттракционы
Нæ горæты рæсугъддзинадмæ бæрзондæй æркæсыны фадат нырæй фæстæмæ ис Цæгат Ирыстоны цæрджытæн æмæ уазджытæн. Олимпаг парк суазæг кодта фыццаг æрбацæуджыты. Парк аив кæныны куыстыты фыццаг къæпхæны уал дзы сæвæрдтой 13 аттракционы. Центрон хайы саив кодтой къахвæндæгтæ æмæ фæлладуадзæн зонæтæ. Рæнхъытæй ныссагътой 240 бæласы. Фидæны та нысан кæнынц сæрмагонд аллейæ декоративон къудзитæй æмæ нæзы бæлæстæй ныссадзын. Парчы разамынд куыд зæгъынц, афтæмæй, Европæйæ æнхъæлмæ кæсынц кусæнгæрзтæм. Уыдоны фæрцы скусын кæндзысты фонтан. Уымæй дарддæр фæстæдæр скусдзæн дымсгæ аквапарк. Нысантæм гæсгæ, парк алы бон дæр бабæрæг кæныны фадат уыдзæн 500 адæймагæн. Сæйрагдæр ирхæфсæн мадзал – фæлгæсыны цалх. Йæ бæрзæнд у 50 метры. Алы кабинæйы дæр ис бандæттæ æмæ кондиционертæ.
