Уый тыххæй аппаратон æмбырды фехъусын кодта фæлхасадмæ цæстдарды республикон управленийы разамонæг
«Омикрон» бахæццæ Цæгат Ирыстоны онг. Нæ республикæйы раиртæстой, ног штаммимæ баст 2 цауы. Уый тыххæй аппаратон æмбырды фехъусын кодта фæлхасадмæ цæстдарды республикон управленийы разамонæг. Уыимæ уавæр, æмтгæй райсгæйæ, у рæстæмбис, загъта Тыбылты Алан. Ивгъуыд къуыримæ коронавирусæй фæрынчын 500 адæймаджы. Адæм æххуыс агурынц 22% къаддæр. Æнæниздзинадхъахъхъæнынады министрады бæрæггæнæнтæм гæсгæ, ковид-госпитальты ныртæккæ ис 538 пациенты. Къуырийы кæронмæ нæ республикæ райсдзæн 14000 экспресс-тесты. Министр Тебиаты Сослан куыд радзырдта, афтæмæй регион цæттæ кæны рынчынты нымæц кæй рæздзæн, уымæ. Уыимæ дзæбæхгæнæн процессмæ фылдæр здахынц медицинон ахуыргæнæндæтты студентты ргом. Сергей Меняйло куыд бафиппайдта, афтæмæй нæ республикæйы алцыдæр хъуамæ уа цæттæ, уавæр кæд февзæрдæр уа, уымæ. Хъуамæ фаг кæной бынæттæ, туаггуыр æмæ хостæ.
Аппаратон æмбырды ма æрныхас кодтой æндæр ахсджаг фарстатыл. Республикæйы Сæргълæууæджы хъæппæрисмæ гæсгæ Цæгат Ирыстоны скъолаты байгом кæндзысты инженерон æмæ медицинон кълæстæ. Уый тыххæй бæлвырд амынддзинæдтæ радтой ахуырады министрадæн. Раздæр уал ахуыргæнæндæтты фæзындысты кадетты кълæстæ. Сергей Меняйло фаутæ æрхаста муниципалон скондты сæргълæуджыты куыстмæ, зæххыты æмæ объектты инвентаризацийы фæдыл. Фиппаинæгтæ уыд горæты коммуналон службæты архайдмæ дæр. Дзæуджыхъæуы разамындæн бабар кодта мит æфснайыны процессмæ ногæй æркæсын. Зæгъæм, къахвæндæгтæ дæр хъæуы митæй сыгъдæг кæнын. Æрдзон ресурсты æмæ экологийы министрадæн та бабар кодта республикон карьертæ сбæрæг кæнын. Куыстытæм бавналдзысты ацы къуыри. Мадзæлтты архайдзысты прокуратурæйы кусджытæ дæр.
