Педагог Хабæты Альбинæ ахуырдзаутимæ стыр æргом аздæхта мультипликацимæ ирон æвзагыл
«Операция Ӕнимация». Афтæ хуыйны Уæрæсейы фæсивæдон змæлды гранттæ исыны конкурсы проект-уæлахиздзау. Йæ автор у æрыгон педагог Хабæты Альбинæ. 577 куысты хсæн йæ проект нымад æрцыд хуыздæрыл. Альбинæ йæ ахуырдзаутимæ стыр æргом аздæхта мультипликацимæ ирон æвзагыл. 2025-æм азы февралы та, йæ проект æххæст кæнгæйæ, ахуыр кæнын райдайдзæн æрыгон педагогты æмæ профилон студентты. Бæлвырддæр хабæрттæ радзурдзæн Хъайтмазты Дзерассæ.
Мультфильмы хъайтарты судæгас кæнын, сценари йæм ныффыссын, сисын æй æмæ монтаж скæнын. Æппæт ацы хъуыддæгтæ зоны центр «Интеллект»-ы 2-æм къласы ахуырдзау Дмитрий Пожидаев. Сфæлдыстадон къордмæ æрбацыд афæдзы размæ йæ хоимæ æмæ уайтагъд йæ зæрдæмæ фæцыд. Скъоладзау ныридæгæн бацархайдта 5 мультфильмы скæныныл. Дмитрий куыд зæгъы, афтæмæй фидæны йæ фæндид йæ цард анимациимæ сбæттын.
Ныртæккæ ам архайы 40 сывæллоны онг. Къорд кусы райдиан кълæсты ахуырдзаутæн. Сæ размæ æвæрд æппæт хæстæ сывæллæттæ сæхæдæг æххæст кæнынц, æрхъуыды кæнынц сценарий, сисынц æрмæг. Уый тыххæй сын æппæт фадæттæ ис. Рæзгæ фæлтæры ахуыр кæны центр «Интеллект»-ы директоры уынаффæгæнæг Хабæты Альбинæ. Мультипликацийы къорд байгом кодта 3 азы размæ сывæллæтты рæвдауæндоны. Ныртæккæ кусы центр «Интеллект»-ы.
Альбинæ куыд зæгъы, афтæмæй мультипликаци сывæллæттæн æрмæст ирхæфсæн нæу, фæлæ ма æрхъуыдыйы рæзтæн æмæ командæйы кусыныл ахуыр кæнынæн хорз фæз. Чызджы ныхæстæм гæсгæ, мультфильмтæн национ тематикæ хуымæтæджы нæ равзæрстой. Афтæмæй сывæллæттæн баиу вæййынц зæрдæмæдзæугæ æмæ пайдайаг хъуыддæгтæ, зæгъы педагог. Хабæты Альбинæ ацы аз рамбылдта Уæрæсейы фæсивæдон змæлды грантты конкурс. Йæ проект хуыйны «Операция Ӕнимация». Æххæст кæнын æй райдайдзæн иннæ аз æмæ цæудзæн 3 къæпхæнæй.
Проекты кæронбæттæн суыдзæн анимацион фестиваль. Æвдыст дзы æрцæудзысты архайджыты æппæт мультипликацион æрмæджытæ. Хуыздæр командæты схорзæхджын кæндзысты зынаргъ призтæй. Фестиваль фæнд кæнынц иннæ аз июны саразын.
