Сæ репертуары фæзынд 4 ног кафты, се хсæн – уырыссаг «Калинка»
Паддзахадон ансамбль «Алан» ацы аз бæрæг кæндзæн йе 85 азы юбилей. Репетициты рæстæг артисттæ сæхиуыл нæ ауæрдынц, хуыздæр кæнынц сæ дæсныйад. Æрæджы уыдысты Мæскуыйы. Сæ репертуары фæзынд 4 ног кафты. Се хсæн – уырыссаг «Калинка». Уæдæ сног кодтой сæ концертон уæлæдарæс дæр. Бахуыдтой сæ Годжысаты Изольдæйы æрмадзы. Ансамблы царды тыххæй бæлвырддæр радзурдзæн Тъехты Элинæ.
Ирон адæмы хæзна – симд æмæ зилгæ – кафт Мæскуыйы. Паддзахадон ансамбль «Алан» 8 азы фæстæ ногæй йæ курдиат æвдисы ацы фæзы. Æмæ хуынд дæр хуымæтæджы не рцыдысты. Ацы аз ансамблыл æххæст кæны 85 азы. Йæ юбилейон аз райдыдта Мæскуыйы Чайковскийы номыл концертон залы. Фидæны – Уæрæсейы алы горæтты концерттæ. Цæмæй уæлахиздзауы ном ма фесафай, уый тыххæй хъæуы æппынæдзух дæхиуыл кусын. Уымæ гæсгæ Мæскуыйæ куы ссыдысты, уæд уайтагъд райдыдтой репетицитæ кæнын. Сæ репертуармæ бахастой 4 ног кафты. Се хсæн – уырыссыг «Калинка» дæр.
Ацы кафтимæ Игорь Моисеевы номыл ансамбль цы сценæмæ схызт, уым архайын уæлдай æхсызгон у. Ансамблы разамонæг Козаты Зелимхан куыд зæгъы, афтæмæй уырыссаг кафт сæвæрын йæ зæрды рагæй уыд. Липецкæй æрбахуыдта хореограф. Специалистмæ æнхъæлмæ кастысты æнæхъæн аз. Уый фæстæ сæм ссыд УФ-йы сгуыхт артист Максуд Кубанов æмæ кафт сæвæрдта иу къуыримæ. Артисттæ афтæ хорз равдыстой сæ дæсныйад, æмæ ма сæ разамонæг дæр дисы бацыд. Куыд зæгъынц, афтæтæй сæхи дæр нæ уырныдта, рауайдзæн сын, уый.
Артистты хорз цæттæдзинад нæ хынцгæйæ «Калинка» акафын æнцон нæ уыд. Куыд зæгъынц, афтæмæй йæ хореографи цæхгæр хицæн кæны.
Коллективы æппæтæй æрыгондæр артисткæ сын у амондхæссæджы хуызæн. Елойты Еленæйыл цæуы æрмæстдæр 18 азы. Ис ыл бæрнон хæс æвæрд. Куыд зæгъы, афтæмæй концерты руаджы райста бирæ æнкъарæнтæ.
Ног кæфтытæ æмæ ног уæлæдарæс. Ансамблы сценикон уæлæдарæс фæзынд Годжысаты Изольдæйы руаджы. Республикæйы хъуыстгонд модельер бирæ азты дæргъы у ансамблы дизайнер.
Алыхуызон дуртæ, риуыгънæджытæ æмæ æндæр элементтæ. Уыимæ концертон уæлæдарæс у уæззау. Зæгъæм, цæцæйнаг кафты цы скæнынц, уый ласы 6 – 7 килограммы. Цæмæй кафт рæсугъд равдисай, уый тыххæй хъæуы хорз спортивон цæттæдзинад. Уæдæ нæлгоймæгты цехы дæр алцыдæр у хæрзæфснæйд. 40 азы онг дзы разамынд дæтты Гæбуты Юзæ.
Фидæны ансамблæн ис ног кæфтытæ æмæ ног хæстæ. Арæхстджын артисттæ куыд зæгъынц, афтæмæй стыр цымыдисимæ ахуыр кæнынц ног кæфтытæ.
