Спикер Вячеслав Володин загъта, ацы нормæйы фарс рахæцын кæй у ныййарджыты æмæ ахуыргæнджыты курдиат.
Паддзахадон Думæйы депутаттæ 2-аг æмæ 3-аг æркасты сфидар кодтой, скъоладзаутæн урокты рæстæг телефонтæй пайда кæныны бар кæй нæй, ахæм закъон. Йæ автортæ систы æппæт партион фракциты депутаттæ. Паддзадон Думæйы спикер Вячеслав Володин загъта, ацы нормæйы фарс рахæцын кæй у ныййарджыты æмæ ахуыргæнджыты курдиат. Йæ ныхæстæм гæсгæ, ахæм уынаффæ хорзырдæм фæзындзæн сывæллæтты ахуырады хæрзхъæддзинадыл. Цæгат Ирыстоны скъолаты ацы хъуыддагмæ цы цæстæнгас ис, уый тыххæй радзурдзæн Хъайтмазты Дзерассæ.
Нырыккон Сыроежкинты æмæ Гусевты ныр бахъæудзæн æнæ гаджеттæй уæвын. Ныр дзæнгæрæг уыдзæн æрмæст урокмæ æмæ баулæфæнмæ. Интернетæй партæйы бын пайда кæнын нал рауайдзæн. Паддзахадон Думæйы депутаттæ кæронбæттæн æркасты сфидар кодтой, скъоладзаутæн урочыты рæстæг ахуырадон нысанимæ дæр телефонтæй пайда кæныны бар чи нæ дæтты, ахæм закъон.
Ахуырадон процессы ахадындзинад уæлдæр кæнын хицæн ахуыргæнæндæттæ снысан кодтой, санитарон-эпидемиологон амындтытæм æмæ скъолайы хи инструкцитæм гæсгæ. Зæгъæм, гимназ «Диалог»-ы ныййарджыты разыдзинадæй 5-æм аз урокты нæ пайда кæнынц гаджеттæй.
9-æм «В» къласы алы райсом дæр райдайы ахуыргонд процедурæйæ. Ацы сывæллæттæ азгай скъолайы цы практикæйыл бакуыстой, уый ныр сси федералон закъон. Педагогтæ та сæ эксперименты фæлтæрддзинад иннæтæн не *вгъау кæнынц.
Закъоны фыццаг æркасты алцыдæр афтæ карз нæ уыд. Фæнд кодтой, смартфонтæй ахуырадон нысанимæ пайда кæныны бар радтын. Фæлæ, гæнæн ис, æмæ пайдайаг опцийы æмæ зианхæссæг ахуыры *хсæн арæнтæ раиртасын нæ бантыст.
Хъайтмазты Альберт нымæцон технологитæй æнтыстджынæй пайда кæны. 15-аздзыд уæвгæйæ наукон конференцийы бахъахъхъæдта, цы фыццаг виртуалон æфтуаныл бакуыста, уый. ВикиБот у электрон чингуыты æмæ интернет-энциклопедийы нымæцон сервисы симбиоз. Альберты хъуыдымæ гæсгæ, бæстæйы ахуырдзаутæн фæрогдæр кæндзæн æрмæст сæ цард нæ, фæлæ се скъолайы хызынтæ дæр.
Закъон у закъон. Æххæст кæнын æй хъæуы, кæд æмæ лыстæг хъуыддæгтæм фарстатæ ис, уæддæр.
Фæлæ бар ма дæттын – фарста алыг кæнынæн алы хатт вæййы ахадгæ фæрæз? Цалынмæ педагогтæ æмæ ныййарджытæ закъоны агурынц уыцы рæстдзинад, уæдмæ психологтæ бæстæйы ахуырадон политикæйы ног хъæппæрисыл дызæрдыг кæнынц.
Сывæллонæн телефонæй спайда кæныны бар уыдзæн, æрмæст йæ цардæн æмæ æнæниздзинадæн тæссаг куы уа, уæд. Афтæ фыст ис документы. Парламентариты ныхæстæм гæсгæ, ивддзинæдтæ дисциплинæ фæхуыздæр кæндзысты. Закъон фидар кæны нормæ, фæлæ æгъдæуттæ бæлвырд кæнынц регионты.
Ахуыргæнджытæн цас бартæ лæвæрд æрцæудзæн, уый нырма бæлвырдгонд нæу. Гæнæн ис, телефон урочы райсын æмæ йæ баулæфæны радтын. Гæнæн та ис, бынтон карз мадзæлттæ сфидар кæнын. Закъоны авторты хъуыдымæ гæсгæ, цавæр æфхæрд æмбæлдзæн, уый снысан кæнын у ахуыргæнджыты æмæ ныййарджыты бон сæрмагонд æмбырдты.
