филиал вгтрк государственная телерадиовещательная компания “Алания”

Къæдоры ног хуыз. Паддзахадон хæххон аграрон университеты студент Бидеты Бексолтан бакуыста ног æхсыры продукт саразыныл. Хуымæтæг къæдормæ бафтыдта цъæх æнгуз, цæмæй ног хойраг пайда уа, йод хъуаг чи æййафы, уыцы адæмæн. Æрыгон ахуыргондмæ ис патент дæр, æрмæст ма продукт хъæуы клиникон уавæрты бафæлварын, æмæ йæ уæд уыдзæн парахатæй уадзæн.

Фыццаджыдæр хъæуы раиртасын, æхсыры цавæр компоненттæ ис, уый. Æрмæст уæд нæ бон у дарддæр архайын, зæгъы хæххон паддзахадон аграрон университеты аспирант Бидеты Бексолтан. Æхсырæй къæдор саразыныл кусы ныр цалдæр азы. Куыд зæгъы, афтæмæй ацы хъуыдаг тынг ахсджиаг у. Уæлдайдæр ныр, уымæн æмæ арæх хойрæгтæ алыхуызон химикон буаргъæдтæй кæй аразынц. Къæдормæ бафтыдта цъæх æнгуз. Афтæмæй æхсыры продукт рауад тынг пайда адæймаджы æнæниздзинадæн.

Бидеты Бексолтан тынг зæрдæргъæвд студент разынд, зæгъынц хæххон аграрон университеты технологон менеджменты факультеты ахуыргæнджытæ. Йæ наукон рзамонæг, факультеты декан Гогаты Олег дзы тынг разы у. Бексолтан æнтыстджынæй архайдта бирæ алыхуызон наукон конкурсты. 2013-æм азы та сси фæсивæды наукон-техникон сфæлдыстады æппæтуæрæсеон равдысты уæлахиздзау. Дыууæ хаты та райста Уæрæсейы федерацийы преми.

Бидеты Бексолтан ма фарон уыд фæсивæдон форум «Машук»-ы дæр. Равдыста дзы йæ проект – ног къæдоры хуыз æмæ райста грант.

Ныртæккæ æрыгон ахуыргонд архайы цыхты ног хуыз саразыныл. Цæмæй диссаг уыдзæн æхсыры продукт, уый нæ раргом кодта. Зындгонд у æрмæст уый, æмæ цыхты уыдзæн цавæрдæр кæрдæг, æнæниздзинадæн пайда чи у, ахæм.