Битарты Вячеслав уæлдай тынгдæр бафиппайдта дохтырты куыст
Паддзахадон хæрзиуджытæй хорзæхгонд æрцыдысты медицинæйы, культурæйы æмæ экологийы къабæзты кусджытæ. Уæрæсейы сгуыхт нывгæнæджы ном саккаг кодтой Цæллагты Викторæн. «Культурæйы сгуыхт кусæг» йæ бирæ азты æнæзæрдæхудт куысты тæххæй сси ансамбль «Дети горы» разамонæг Козаты Станислав. Æлборты Иванæн радтой «Экологийы сгуыхт кусæджы» ном. Наукон-педагогон къабазы æнтыстджын куысты тыххæй бæстæйы Президенты арфæйы фыстæг райста Цалиты Алыксандр. «Ирыстоны Намысы майдан»-æй хорзæхгонд æрцыдысты æртæ адæймаджы. Се хсæн – фæллойы ветеран Гаппуаты Барис. Мæздæджы районы администрацийы минæвар Нурмахомат Будайчиев æмæ агрохимион службæйы станцæйы директоры хæдивæг Сокаты Хъуырман.
Битарты Вячеслав уæлдай тынгдæр бафиппайдта дохтырты куыст. Афтæмæй, коронавирусы ныхмæ тох кæныны хъуыддагмæ стыр æвæрæн кæй бахастой, уый тыххæй Пироговы номыл орденæй хорзæхгонд æрцыдысты 15 адæймаджы. 5-æн та радтой Хъырымаг Лукайы майдантæ. Бæстæйы Президенты кады гæххæт райстой 8 дохтыры, бæстæйы разамонæджы номæй арфæйы фыстæг æнæниздзинадхъахъæнынады къабазмæ цæстдарды регионалон службæйы разамонæг Ольга Давыдова. Республикæйы кады гæххæттытæй хорзæхджын æрцыдысты 7 медицинон кусæджы. «Уæрæсейы сгуыхт дохтыры» кадджын ном лæвæрд æрцыди медицинон академийы профессор Хуытъиты Цæрайæн.
