Проекты Цæгат Ирыстонæй архайдзысты Айларты Эллинæ æмæ Гаглойты Алан
Паддзахадон телерадиокомпани «Алани» хъусын кæны патриотон зарæджы Æппæтуæрæсеон телевизион марафон-фестиваль «С чего начинается Родина»-йы архайджыты нæмттæ. Проекты Цæгат Ирыстонæй архайдзысты Айларты Эллинæ – æвзæрст æрцыд жюрийы хъæлæсты хатдзæгтæм гæсгæ, æмæ Гаглойты Алан интернетæй пайдагæнджыты хъæлæстæм гæсгæ. Æдæппæтæй регионалон къæпхæны архайынмæ курдиæттæ балæвæрдтой 65 адæймаджы. Се хсæн хицæн зарæггæнджытæ æмæ хортæ, уырыссаг æмæ ирон æвзæгтыл зарджытæ, стæй авторон уацмыстæ. Профессионалон жюри скодта регионалон къæпхæны хатдзæгтæ. Жюрийы æмæ адæмы хъæлæсты æвзæрстмæ гæсгæ хаст æрцыд, æрдæгфиналистты нымæц 10-æй 21-ы онг фæфылдæр кæныны уынаффæ. Се ппæт æрдæгфиналистты дæр хонынц радио «Алани»-йы сæрмагонд эфиры архайынмæ. Уыдзæн 12 июны – Уæрæсейы боны. Бæрæгбоны эфиры комкоммæ трансляци уыдзæн телерадиокомпани «Алани»-йы сайты. Финалисттæ Айларты Эллинæ æмæ Гаглойты Алан та уыдзысты Æппæтуæрæсеон паддзахадон телерадиокомпанийы федералон эфиры телемарафоны архайджытæ. Сæ зарджытæ сын ныффысдзысты радио «Алани»-йы профессионалон студийы. Уый фæстæ та телекомпанийы сæрмагонд проектты службæ йе ххуысы хай бахæсдзæн клиптæ сисынмæ. Равдисдзысты сæ 12-æм июны, Уæрæсейы боны, платформæ «СМОТРИМ»-ы телепроекты. Уымæй уæлдай ма, ПТРК «Алани»-йæ жюрийы хыгъды чи ис, уыдон рахастой, телекомпанийы номæй Гæботы Максимæн сæрмагонд приз снысан кæныны уынаффæ. Уый сæрмагондæй телемарафонмæ йæ музыкалон къордимæ бацæттæ кодта композици «Я Родиной достойной дорожу». Музыкæ зарæггæнæг йæхæдæг ныффыста, ныхæстæ та Хабæты-Гæджынаты Риммæ. Габоты Максимæн ма фадат уыдзæн, телерадиокомпанийы студийы профессионалон аудиовидеоæрмæг скæнынæн. Марафоны финалисттæн, æрдæгфиналисттæн æмæ архайджытæн дипломтæ саккаг кæндзысты ПТРК «Алани»-йы 12-æм июны.
