Ерыстæ баст уыдысты станицæйы 242 азы бонимæ
Павлодольскæйы станицæйы уыди сывæллæтты турнир футболæй. Ерыстæ баст уыдысты станицæйы 242 азы бонимæ. Архайдтой дзы 4 футболон командæйы. Станицæмæ æрæмбырд сты Мæздæджы районы, стæй Кæсæг-Балхъары республикæйы спортсментæ. Уазджытæн æмæ бынæттон цæрджытæн арфæ ракодтой Мæздæджы районы сæргълæууæг Олег Яровой, уырыссаг чырыстон аргъуаны æмæ хъазахъхъæгты æхсæнады минæвæрттæ. Мæздæджы район кæдфæндыдæр хъуыстгонд уыди уазæгуарзондзинадæй. Æмæ ныр дæр афтæ. Стадионы равæрдтой быдырон цæлгæнæн, æмæ се ппæты боны дæр уыди бацæуны, æмæ хæринагæй саходын. Ерысты хатдзæгтæм гæсгæ, Павлодольскæйы станицæйы æвзонг футболисттæ нымад æрцыдысты хуыздæртыл. Бæрæгбоны программæ хъæздыг уыди æндæр ерыстæй дæр: бæндæн ивазынæй, уæзæгтæ исынæй, æмæ спорты æндæр хуызтæй. Сфæлдытадон къордтæ та бацæттæ кодтой тематикон концерт. Станицæйы бон ныр афтæ бæрæг кæндзысты æрвылаз дæр. Хъазахъхъæгты æхсæнады минæвæрттæ сæ размæ сæвæрдтой хæс – сæ фыдæлты иннæ традицитæ дæр сног кæнын.
