Уæлахиздзауты нæмттæ сбæрæг уыдзысты рæхджы.
Алы ахуырдзаумæ æмæ урокмæ дæр хицæн цæстæнгас дарын. Уый хуымæтæг æмæ æнцон хъуыддаг нæу. Конкурстæ «Афæдзы хъомылгæнæг», «Афæдзы ахуыргæнæг» æмæ «Педагогон дебют»-ы регионалон къæпхæнты сæ тыхтæ бафæлвæрдтой хуыздæртæ. Уыдоны тыххæй бæстондæр радзурдзæн Сосранты Жаннæ.
Ахуыргæнæнджы курдиатæй фæхаджын уæвæг Багаты Ибрагим йæ цард нæ уыны æнæ йæ уарзон куыстæй. Заманхъулы скъолайы кусгæйæ историмæ æмхиц кæны сабиты. Уыимæ фæархайы алы æмвæзады профессионалон конкурсты. Фарон сси конкурс «Педагогон дебют»-ы регионалон къæпхæны уæлахиздзау. Ацы аз дæр йæ зæрдæ дары йæхиуыл, уырны йæ æвзæрдæр бæрæггæнтæ кæй нæ равдисдзæн, ууыл.
Ææппæтуæрæсеон конкурс «Учитель года России»-йы регионалон къæпхæны бацархайдзæн республикæйы скъолаты 22 минæвары. Уыдон сты муниципалон къæпхæнты уæлахиздзаутæ. ацы аз конкурс аразджытæ стыр куыст бакодтой скъолаты æмвæзады.
Ерысты архайынц куыд фæлтæрдджын ахуыргæнджытæ, афтæ æрыгæттæ дæр. Фæлæ жюри се ппæтмæ дæр кæсы иу цæстæй. Мамсыраты Давид у экономист. Цалдæр азы размæ та сфæнд кодта йæ дæсныйад баивын æмæ йе ргом аздæхта сывæллæтты хъомыладмæ. Конкурсы бацархайын æй бафæндыд, цæмæй базонгæ уа ахуырады ног гæнæнтимæ, стæй иннæты базонгæ кæна йæхи арæхстдзинадимæ.
Райдайæн къæлсты ахуыргæнæг Кристина Щербаненко дæр у конкурс «Педагогон дебют»-ы архайджытæй иу. Мæздæджы скъолайы минæварыл тынг тыхсынц куыд йе мкусджытæ, афтæ йæ ахуыргæнинæгтæ дæр. Кæд ахуыргæнæндоны æртæ азæй фылдæр нæма кусы, уæддæр тынг бауарзта практикон æгъдауæй йæ куыст. Куыд зæгъы, афтæмæй райдиан кълæсты ахуыргæнæгыл бæрнондæр хæс ис.
Ацы мадзалы йæ архайджытæ базонгæ вæййынц кæрæдзийы фæлтæрддзинадимæ. Равдисынц урокты, стæй фæсурокты скъоладзаутимæ куыд архайынц, уый. Слохаты Розæ ныридæгæн бацархайдта ацы конкурсы. Фарон сси республикон къæпхæны уæлахиздзау. Ныр цымыдисæй кæсы конкурсантты архайдмæ.
Ахуыргæнджытæн профессионалон дæсныдзинады ерыстæ сты ахуырады къабазы егъау цау. Йæ архайджытæн фарсхæст радта Цæгат Ирыстоны ахуырад æмæ наукæйы министр Алыбекты Эллæ.
Зæгъын ма хъæуы уый дæр, æмæ конкурсы архайджыты дæсныйадæн аргъ кæнынц экспертты дыууæ къорды. Уæлахиздзауты нæмттæ сбæрæг уыдзысты рæхджы.
