Йæ хæстæджытæ йæ æнæ фатерæй куы ныууагътой, уæдæй фæстæмæ Циури йæ хæдзар хоны раздæры административон бæстыхай, кæд æмæ дзы цæрынæн хуымæтæг уавæртæ дæр нæй, уæддæр
Ног фатерты хицæуттæм бахæлæг кæндзæн Октябрьскæйы цæрæг Цыбырты Циури дæр. Йæ хæстæджытæ йæ æнæ фатерæй куы ныууагътой, уæдæй фæстæмæ Циури йæ хæдзар хоны раздæры административон бæстыхай, кæд æмæ дзы цæрынæн хуымæтæг уавæртæ дæр нæй, уæддæр. Пенсиисæг æмæ йæ цоты цот цæрынц зæронд куыройы административон корпусы.
Ацы бæстыхайы раздæр уыд зæронд куыройы административон корпус. Цæуы йыл 70 азы бæрц. Зын бауырнæн у, фæлæ ацы хæдзары æнæ донæй æмæ газæй, 6 азы дæргъы цæры Цыбырты Циури. Йæ цоты цотимæ баззади æнæ цæрæнуатæй. Сылгоймаджы хæстæджытæ йын байстой йæ фатер. Ныр Цыбыртæн æндæр гæнæн нал ис, æмæ цæрынц кæлæддзаг бæстыхайы. Циурийы бинойнаг æбæрæгæй фесæфти цалдæр мæйы размæ.
Циурийыл цæуы 80 азмæ хæстæг. Кусы Горæтгæрон районы рынчындоны санитаркæйæ. Исы пенси. Йæ кæлæддзаг хæдзары цæры йæ цоты дыууæ чызгимæ. Хистæрыл цæуы 18 азы, у медицинон колледжы студенткæ, кæстæрыл та цæуы 13 азы. Куыд зæгъынц, афтæмæй сын цæрынæн фæрæзтæ нæ фаг кæнынц. Бинонтæ сæ зæрдæ дарынц æххуысыл.
Æппæтуæрæсеон адæмон фронты минæвæрттæ Цыбырты бинонтæн æххуыс кæнынц, сæ бон куыд у, афтæ. Рæстæгæй-рæстæгмæ сын баласынц хойраджы продукттæ æмæ фыццаджыдæр чи хъæуы, ахæм товартæ. Фæлæ зæгъынц, бинонтæн хъæуы егъаудæр æххуыс бакæнын. Цыфæнды рæстæг дæр хæдзарæн йæ бон у ныккæлын.
Цыбырты Циури йæ зæрдæ дары, йе ххуысы курдиат ын кæй фехъусдзысты, ууыл. Зымæджы ам цæрæн уæвгæ дæр нæй. Пайда фæкæнынц сугтæй, фæлæ уыдон дæр алы хатт нæ вæййынц. Иу ахæм зымæг ма куыд арвитдзæн, уый ацæрæгæ сылгоймаг нæ зоны.
