Æхсæв сæм дон æппындæр нæ вæййы
Поселок Спутникы 43-æм хæдзары цæрджытæ бирæ рæстæг тыхсынц сæ доны уавæрæй. Æхсæв сæм дон æппындæр нæ вæййы. Цæрджытæ хъаст кодтой алы рæттæм, фæлæ дзуапп нæ райстой. Æххуысмæ сæм æрбацыдсты Адæмон фронты специалисттæ. Бæлвырддæр радзурдзæн Хъайтмазты Дзерассæ.
Нæдæр тæвд, нæдæр уазал дон нæй. Ацы фарста ног нæу. Поселок Спутникы 43-æм хæдзары цæрджытæ ахæм уавæрæй бирæ рæстæг тыхсынц. Зоя ВакАлова куыд зæгъы, афтæмæй сæм дон фæцæуы бонæй, æхсæвы та – нæ. Ныр та ма профилактикон куыстытæ цæуынц, æмæ сæм рæстæгмæ тæвд дон дæр нæй. Цæрджытæ дондзæуæн куыстуатмæ бирæ хæттыты сидтысты, фæлæ официалон дзуапп афтæ дæр нæ райстой.
Сæ хъаст бахастой адæмон фронтмæ. Æхсæнадон архайджытæ поселочы цæрджытимæ сæмбæлдысты æмæ скодтой инспекци. Адæмон фронты регионалон хайады координатор Хацырты Олег загъта, æппæт курдиæттæ профилон ведомствæтæм ратдзысты.
Бынæттон цæрджыты æрмæст доны уавæр нæ тыхсын кæны. Ныр 20 азы ам ис æрдæгарæзт бæстыхай. Раздæр æхгæд нæ уыд, зындис арматурæ, бынæттон сывæллæттæ территорийы арæх хъазыдысты. Уый та æдас нæ уыд. Ирыстойнаг районы префектурæйы фæрцы бæстыхайы разуынд быруйæ сæхгæдтой, фæлæ пъадвалы цы дон æмбырд кæны, уый хъары цæрæн хæдзæрттæм. Уый тыххæй бацæуæнты æмæ фатерты сæвзæры уымæлад æмæ хъуына.
Æрдæгарæзт бæстыхайы фæдыл Адæмон фронты минæвæрттæ курдиат арвитдзысты Дзæуджыхъæуы администрацимæ.
