Дзурæг у Цæгатаг адæмы историйыл
Аивад куыд культурæты бастдзинад. Проект «Сибирь – Осетия: куклы на гастролях» æххæст кæнгæйæ, Цæгат Ирыстоны равдыстой спектакль «Легенда». Дзурæг у Цæгатаг адæмы историйыл. Алтайы таурæгътæ ирон сценæмæ куыд рахастой, уый тыххæй радзурдзæн Чехойты Фатимæ.
Театр «Саби»-йы сценæйы – рагон тайгайы уылæфт. Сæйраг хъайтар – æрыгон дæсны Бий. Цæры хъæды. Уым ын алы бæлас – йæ хæлар, дымгæйы уддзæф та æрбахæссы фыдæлты хъæлæс. Йæ курдиат – иннæтæй *мбæхст цы у, уый хъусын. Иу хатт Бий сæмбæлд Дымгæйы бардуаджы чызг – Катуньыл.
Уыцы фембæлд сси, царды уæвæн кæмæн нæй, уыцы уарзондзинады историйы райдиан. Æнкъарæнтæ æнусон æгъдæуттæй разындысты тыхджындæр. Сценæйы – рухс, музыкæйы улæфт æмæ пластикæйы иугонд. Постановкæйы равдыста сыбираг дымгæты уддзæф æмæ алтайаг æрхъуыдыгонд уацмысты мидис.
Спектакль «Легенда» дзуры Сыбыр æмæ Алтайы бынæттон цæрджыты хæзнатыл. Аивадуарзджытæ банкъарынц адæймаг æмæ æрдзы иудзинад, афæлгæсынц фæлтæрæй фæлтæрмæ цы æгъдæуттæ лæвæрд цæуынц, уыдоныл. Театралон хъуыды царды рауадзын бантыст, проект «Сибирь – Осетия: куклы на гастролях» æххæстгæнгæйæ. Постановкæйæн аргъ скодтой Новосибирскы цæрджытæ, ныр та премьерæ ацыд Цæгат Ирыстоны.
Проект «Сибирь – Осетия: куклы на гастролях» æххæстгонд цæуы культурон хъæппæристы Президентон фонды руаджы. Ацы сезон нысан кæнынц цалдæр премьерæйы равдисын. Къуырийы кæрон чысыл театрдзаутæ фендзысты спектакль «Сызгъæрин антилопæ», Ног азы бæрæгбæтты та – «Щелкунчик».
