Цæгат Ирыстоны профцæдисон организациты минæвæрттæ æрæмбырд уыдзысты театралон фæзы.
Профцæдисты организацитæ 1-æм майы
Дзæуджыхъæуы сарадзысты демонстраци. Демонстрацитæ уыдзысты Уæрæсейы æппæт
горæтты дæр. Цæгат Ирыстоны профцæдисон организациты минæвæрттæ æрæмбырд
уыдзысты театралон фæзы. Демонстрацимæ рацæудзысты промышленон куыстуæтты
кусджытæ, амалхъом адæм, студенттæ, интеллигенцийы минæвæрттæ. Мадзалы
архайджытæ домдзысты, цæмæй сын уа аккаг мызд, æмбæлгæ куысты уавæртæ, стæй
цæмæй республикæйы саразой ног куысты бынæттæ.
5 сæрмагонд агъуысты – бомбææмбæхсæнтæ.
Николай Фирсов йæ алы бон дæр райдайы æркастæй. Дзуры, ацы агъуыстыты гæнæнты
тыххæй. Сарæзтой сæ нырма Советон дуджы. Бынат дзы ис 2 мин адæймагæй фылдæрæн.
Ныртæккæ тæссаг уавæр нæу, фæлæ
агъуыстытæй бахъуаджы сахат спайда кæнын уыдзæн. Хорз уавæры сты. Ис дзы
хæринаджы, ансептикты, хъахъхъæнынады фæрæзты æвæрæнтæ, кусы бастдзинад. Æмæ
сæйрагдæр ам ис тыхджын фильтрты системæ. Химикон кæнæ радиоактивон атакæ куы
уа, уыцы уавæрæн.
Николай Александрович завод «Победиты» кусы ныр 41-æм
аз. У иунæг фронтовик, ныры онг чи фæллой кæны, ахæм. Уымæй дарддæр ма лæууы
граждайнаг хъахъхъæнынады æмæ æнæнхъæлæджы уавæрты штабы сæргъы. Николай Фирсов
райгуырд 1927-æм азы Ворошиловограды облæсты. Хæрзæрыгонæй райдыдта шахтæйы
кусын. Уый фæстæ йæхицæн бафтыдта иу аз, æмæ ацыд фыдыбæстæ хъахъхъæнынмæ.
1944-æм азы æрвыст æрцыд 1-аг Белоруссаг фронтмæ. Бахауд 344-æм гвардион уæззау
артиллерион пъолкмæ. Уæгъд кодта Польшæ, æмæ бахæццæ Бранденбурджы онг. Йæ
пъолк немыцаг æфсæдты ныппырх кодта, Берлинæй фалдæр – Потсдамы. Йæ
хъæбатырдзинады тыххæй йын лæвæрд æрцыд Фыдыбæстæйы Стыр хæсты 2-аг къæпхæны,
æмæ Намысы 3-аг къæпхæны ордентæй. Уымæй дарддæр æм ис бирæ майдантæ дæр. Стыр
аргъ кæны, Советон Цæдисы маршалы арфæйы фыстæгæн. Заводы кусгæйæ та ма сси
фæллойы ветеран дæр.
Раздæры азты куыд уыди,
афтæ ныр дæр Николай Фирсов йæхи цæттæ кæны 1-æм майы демонстрацимæ. Сæ
хъуыдытæ равдисынмæ рацæудзысты профцæдисты уæнгтæ. Транспаранттимæ æрцæудзысты
Кировы уынгæй Театралон фæзы онг.
Æппæтуæрæсеон акцийы республикæйы
архайдзæн профцæдисты 5 мин минæварæй фылдæр. Сæ сæйраг хъуыды » Ахсджиаг
фæллойæн æмбæлгæ аргъ, æмæ рæстдзæвин социалон политикæ».
Профцæдисты
организацийы зæгъынц, фарон кадджын уавæры сбæрæг кодтой змæлды 100 азы.
Фидæнмæ дæр кæсынц ныфсджынæй. Уымæн æмæ профцæдистæ кæддæриддæр иу кодтой æмæ
кæнынц дунейы фæллойгæнджыты, æмæ тох кæнынц сæ бартыл.
