Ацы темæйыл ма суанг бацæттæ кодта наукон-иртасæн куыст дæр æмæ архайдта конкурс «По ступенькам науки в будущее»-йы.
Лацойты Давид æрдыныл æнæуæндонæй хæцы. Хъисын-фæндырыл цæгъдын нырма нæ зоны. Фæлæ йæ бон у музыкалон инструменты историйы тыххæй радзурын.
Давид зонгæ у, æрмæст хъисын-фæндыры нæ, фæлæ æндæр ирон музыкалон инструментты историимæ дæр. Уый тыххæй бæстонæй радзырдта йæ наукон-иртасæн куысты. Бацæттæ йæ кодта конкурс «По ступенькам науки в будущее»-мæ. Ацы хæс æххæст кæныныл сæрмагондæй бацархайдта – бацæттæ кодта презентаци, сарæзта æрфарст, адæм цавæр национ музыкалон инструменттæ зонынц, уый тыххæй.
Лацойты Давид: «Мæ наукон куыст у ирон адæмон уадын инструментты тыххæй. Уыдон бирæ азты уыдысты сæфт. Фæлæ сыл фæстаг цалдæр азы архайд цæуы. Мæн фæндид, цæмæй алы хæдзары дæр ирон уадынгæрзты цагъд цæуа».
Давиды куыст прогимназ «Интеллект»-ы нымад æрцыд хуыздæрыл. Республикон къæпхæны та 3-аг къласы ахуырдзауы проект номинацийы «Искусствоведение æмæ технологи»-йы бацахста 2-аг бынат. Давиды ахуыргæнæг Гуацъæты Иринæ куыд зæгъы, афтæмæй ацы куыст лæппуйæн тынг фæпайда ис.
Гуацъæты Иринæ, прогимназ «Интеллект»-ы ахуыргæнæг: «Давидæн ацы иртасæн куыст йæ зæрдæмæ тынг фæцыдис. Ацы куыст цæттæгæнгæйæ йæ зонындзинæдтæ фæфылдæр сты. Афтæ хорз æй бацæттæ кодта, æмæ ныр ацы темæ цымыдисаг у йе `мбæлттæн дæр».
Ирон музыкалон культурæмæ цымыдисдзинад Давидмæ фæзынд йе рвад – Илаты Тимурæй. Уый национ инструменттыл цæгъды, стæй сæ аразын дæр зоны. Уымæн та ацы зонындзинæдтæ радта адæмон дæсны Моурауты Сослан.
Илаты Тимур: «Кæстæр фæлтæр куы нæ иса уыцы зонындзинæдтæ, уæд фесæфдзæн ирон æгъдау дæр, нæ музыкалон культурæ дæр».
Ныртæккæ Давиды фæнды ирон инструменттыл цæгъдын сахуыр кæнын. Цы тырнындзинад æм ис, уыимæ йæ къухы кæй бафтдзæн, уый дызæрдыггаг нæу.
Хъайтмазты Дзерассæ
