Уыцы бынæттæ равзæрстой республикæйы цæрджытæ 2024 азы хъæлæскæныны руаджы
Федералон программæ «Горæты æнцонвадат цард» æххæстгæнгæйæ Дзæуджыхъæуы ацы аз арæзтадон куыстытæ цæуынц 18 æхсæнадон территорийы. Уыцы бынæттæ равзæрстой республикæйы цæрджытæ 2024 азы хъæлæскæныны руаджы. Уæлдай цæстдард цæуы Терчы былгæроны арæзтадмæ. Гагариты æмæ Павлик Морозовы уынгты рацараздзысты сквертæ. 15 азмæ фыццаг хатт куыстытæ цæуынц 1-æм поликлиникæйы алыварс. Бæлвырддæр радзурдзæн Чехойты Фатимæ.
Гагарины уынджы дарддæр аивгонд цæуы сквер. Йæ сног кæныныл горæты цæрджытæ схъæлæс кодтой фарон. Ног бордюртæ æмæ брусчаткæ – тагъд рæстæг ма Дзæуджыхъуы фæзындзæн ноджыдæр иу фæлладуадзæн бынат. 18 æхсæнадон территори рацарæзыны куыстытæ цæуынц национ проект «Инфраструктурæ – цардæн» æххæстгæнгæйæ.
Ныртæккæ куыстытæ цæуынц Терчы былгæрон – Плиты Иссæйы номыл уынгæй фысымуат «Владикавказ»-ы онг. Нысан кæнынц ныллæг брутæ баивын, брусчаткæ æмæ рухсгæнæнтæ сæвæрын. Ацы аз аивгонд æрцæудзæн Терчы былгæронæн йæ галиу фарс, зæгъынц специалисттæ.
15 азмæ фыццаг хатт бавнæлдтой 1-аг поликлиникæйы сквер рацаразынмæ. Куыстытæ ахæсдзысты 2 азы. Зæронд асфальт систой, æвæрынц брусчаткæ. Ивддзинæдтæ фенæн ис Павлик Морозовы уынджы скверы дæр.
Национ проект «Инфраструктурæ -цардæн » æххæстгæнгæйæ 2019 азæй республикæйы рацарæзтой 225 æхсæнадон территорийы. Куыстытæ дарддæр цæуынц æнæкъуылымпыйæ.
