Ацы цауыл æрныхас кодтой аппаратон æмбырды
Прокуратурæ бæрæггæнæн куыст кæны, сывæллæтты рæвдауæндон «Эрудит»-ы хъомылгæнинæгтæ кæй фæхъæстæ сты, уый фæдыл. Ацы цауыл æрныхас кодтой аппаратон æмбырды. Фæлхасадмæ цæстдарды управленийы куыд фехъусын кодтой, афтæмæй ныртæккæ специалисттæ бæрæг кæнынц, цы пробæтæ систой, уыдон. Уæ зæрдыл уын æрлæууын кæндзыстæм, ивгъуыд къуырийы рæвдауæндоны 6 хъомылгæнинагæн сæвæрдтой инфекцион диагноз, æмæ сæ баластой республикæйы сывæллæтты клиникон рынчындонмæ. Раиртæстой сæм къорд «А»-йы ротавирус. Рæвдауæндоны куыст æрлæууын кодтой 26-æм майы онг. Знон скодтой ахуыргæнæндоны кæронбæттæн дезинфекци.
Æмбырды ма ныхас цыд Арвы комы фæндаджы уавæрыл дæр. Ныртæкæ дзы рады лæууынц 800 уæзласæн машинæйæ фылдæр. Кусынц 3 мобилон хъармгæнæн пункты. Арвы комы фæндаг æмæ Транскам транспортæн сты гом. Сергей Меняйло загъта, иувæрсты цæуæг фæндаг эксплуатацийы куы радтой, уæд уавæр зынгæ фæрогдæр уыдзæн. Ныртæккæ та уал бакусын хъæуы сæрмагонд программæйыл, цæмæй транзитон уæзласæн машинæйæн электрон рад скæной, уый тыххæй. Уыцы хæс сæххæст кæнын регионы сæргълæууæг бабар кодта республикæйы нымæцон рæзты Комитетæн. Транспорты æмæ фæндаггон инфраструктурæйы Комитет æмæ экономикон рæзты Министрад та иумæ хъуамæ бакусой транспортæн æрлæууæн бынæттыл.
