Донор кæмæн сси, уыцы адæймаджы Наталия 2 азы фæстæ базыдта, чызджы фыццаг хатт сæмбæлдысты Санкт-Петербурджы
Нæ программæйы уын радзурдзыстæм не мкусæг, сæрмагонд уацхæссæг Наталия Фрейбергы тыххæй. Æрмæст курдиатджын тележурналист нæу, фæлæ ма зæрдæхæлар адæймаг дæр. Сси стджыты магъзы донор. Наталияйы биоæрмæг сбæззыд æнæзонгæ чызгæн, æмæ йын афтæмæй бантыст йæ цард аирвæзын кæнын. Донор кæмæн сси, уыцы адæймаджы Наталия 2 азы фæстæ базыдта. 2 чызджы фыццаг хатт сæмбæлдысты Санкт-Петербурджы. Наталия, ды дæ стыр дæнцæг, æмæ дæ нæ сæр хæссæм бæрзæндты. Темæ дарддæр ахæццæ кæндзæн Хъайтмазты Дзерассæ.
Цæстысыг нæ уромгæйæ, ацы 2 чызджы кæрæдзийæ атонын нæ комынц. Ацы фембæлд никуы ферох кæндзысты. Æнæмæнг баззайдзæн сæ зæрдæты – ног цард чи райста, уыцы репициенты, стæй йын æй чи балæвар кодта, уыцы доноры. Кæй аирвæзын кодта, уыцы адæймагимæ искуы базонгæ уыдзæн, уый æнхъæл Наталия Фрейберг нæ уыд. Фæлæ иу хатт райста хъусынгæнинаг Дарья Фоминайæ. Æмæ йын ныр уыцы чызг сси хионау хæстæг.
Стджыты магъзы трансплантаци цы у, уый не мкусæг базыдта æрмæг исгæйæ. Уырдæм æй цыма йæ хъысмæт абалц кодта, уый хуызæн. Æрмæг исгæйæ, Наталия сфæнд кодта донорты регистрмæ бацæуын. Редакцион хæслæвæрд æххæстгæнгæйæ кæронмæ не мбæрста, цы стыр хъуыддагмæ æвæрæн хæссы, кæйдæр цард ирвæзын кæны, уый. Йæ генетикон фаззоныл хъуыдыгæнгæйæ йæм уыд æрмæст иу фæндон – цæмæй алцыдæр хорз уа.
Фидæны донорæн йæ бон йæхи регистрæй сисын у цавæрфæнды къæпхæныл дæр. Фæлæ ахæм фæндон Наталиямæ нæ разынд. Куыд зæгъы, афтæмæй æмбæрста, цы бæрнон хъуыддаг у, æмæ йе ххуыс кæй хъæуы, уыцы адæймаг æм, куыд тынг æнхъæлмæ кæсы, уый. Ныртæккæ репициент йæхи бирæ хуыздæр æнкъары. Æмæ Татæйæн, афтæ йæ мах хонæм редакцийы, уый у æппæтæй ахсджиагдæр лæвар.
Куыд алы процедурæйæн, афтæ иу адæймаджы стджыты магъз иннæмæн радтынæн дæр ис йæхи хицæндзинæдтæ. Фæлæ донор суæвын чи сфæнд кодта, уый мæт кæнын нæ хъæуы. Иу адæймаг иннæмæн цы туджы чырæгтæ радты, уыдон фæстæдæр сног вæййынц. Зындæр вæййы рынчынæн. Уымæн йæ ирвæзынгæнæджы ссарын вæййы стыр фæлварæн. Фæлæ уыцы фарста дæр лыггонд цæуы. Æрæджы сфидар кодтой, стджыты магъзы донорты федералон регистр саразыны тыххæй уынаффæ.
Сæ донортæм æнхъæлмæ кæсынц мингай онкологон рынчынтæ. Алкæйдæр хъæуы чи сын бæззы, ахæм туджы чырæгтæ. Адæймаджы цард аирвæзын кæнын ахæм зын хъуыддаг нæу.
Иу адæймаджы стджыты магъз иннæмæн радтыны процедурæ рынчынæн дæтты æрмæст цæрыны фадат нæ. Лæвар ын кæны ноджы дæр ма иу хæстæг адæймаджы. Гæнæн ис, æмæ цæры дард, фæлæ æдзух ис, кæмæн баххуыс кодта, уый зæрдæйы.
