Ацы ногдзинæдтæ фадат ратдзысты рынчынтæн æххуыс кæныны æмвæзад фæуæлдæр кæнынæн
Пульмонологон æххуысы республикон центр райста ног медицинон кусæнгæрзтæ. Ацы ногдзинæдтæ фадат ратдзысты рынчынтæн æххуыс кæныны æмвæзад фæуæлдæр кæнынæн. Фæлæ æрмæст уый нæ. Медицинон куыстуаты уыдзæн æндæр ивддзинæдтæ дæр. Нысан кæнынц зæронд бæстыхай сцалцæг кæнын, æмæ ног саразын. Иу ныхасæй, спайда кæндзысты алы гæнæнтæй, рынчындоны нырыккон уавæртæ скæнын, цæмæй дзы адæм сæхи æнкъарой æмбæлгæ хуызы. Дарддæр радзурдзæн Касаты Наирæ.
Æмæ уый ног рентген аппарат æрмæст уымæй раппæлинаг нæу. Ис ма йын æндæр хорз æууæлтæ. Фæлæ сæйрагдæр та уый, æмæ адæймаджы æнæниздзинадæн знаггад хæсдзæн къаддæр, ома йæ рентгены тынтæй иртасыны æмвæзад уыдзæни ныллæгдæр. Пульмонологон æххуысы республикон центры сæйраг дохтыр Хæмæтаты Зауырбеджы ныхæстæм гæсгæ, рентгены хуызистыты хæрзхъæддзинад у компьютерон диагностикæйы хуызæн. Ног кусæнгæрзтæ æвæрд æрцыдысты ног цалцæггонд кабинеты. Бæстыхæйттæм базылдысты меценатты фæрæзтæй.
Годжысаты Таймураз 30 азæй фылдæр рынчын у астмæйæ. Тыхсы хуыфæгæй, фæриссы йæ риу, улæфт ын нал фæфаг кæны. Баххуыс ын кæны æрмæстдæр Пульмонологон центры терапийæ. Фыййагдонмæ йæхи дзæбæх кæнынмæ ацæуы алы аз дæр. Куыд зæгъы, афтæмæй йын æхсызгон у, зæронд медицинон кусæнгæрзтæ ногтæй ивд кæй æрцыдысты, уый. Пульмонологон центры УЗИ аппарат никуы уыди. Ныр дзы фæзынд.
Пульмонологон центр нырыккон кусæнгæрзтæй сифтонг кодтой 30 милуан сомæн. Уый æрмæст кардио æмæ рентгены аппараттæ не сты. Фæлæ, ингалятортæ, туаггуыры концетраттæ æмæ æндæр медицинон кусæнгæрзтæ. Ног фæрæзтæ фадат ратдзысты рынчынтæн нырыккон медицинон æххуыс бакæныны æмвæзад фæуæлдæр кæнынæн.
Ацы стыр камерæйы æххуысæй рынчынтæн бæстондæрæй цæстдард цæудзæн сæ рæуджытæм. Ам ис нырыккон датчик æмæ компьютер, сæ бон у рæуджытæн бындурон диагностикæ кæнын.
Пульмонологон центр ма уæддæр у ноггæнинаг. Бæстыхай дæр рагон у. Хъæуы йæ рацаразын, цæмæй дзы рынчынты æрмæст дзæбæх ма кæной, фæлæ реабилитаци дæр. Ардæм цæуынц, ковиды фæстæ йæхи æвзæр чи æнкъары, ахæм адæм дæр. 70-йæм азты ацы рынчындон уыди шахтæйы кусджыты. Уый фæстæ йæ фæуæрæхдæр кодтой, æмæ медицинон организаци лæггад кæнын райдыдта республикæйы æппæт цæрджытæн. Ацы бæстыхайы цалцæг нысангонд æрцыди 2023-æм азмæ. Фæзындзæн дзы ног корпус дæр. Президенты уынаффæмæ гæсгæ, арæзтад хаст æрцыди федералон инвестицион программæмæ. Ацы аз федералон бюджетæй фæрæзтæ дих кæнынæн бакусдзысты проектон-сметон документацийыл. Медикон-техникон хæслæвæрдтæ ныридæгæн ныффидар кодта Уæрæсейы æнæниздзинадхъахъхъæнынады министрад.
