2021-æм азæй Уæрæсейы фæсивæдæн федералон бюджеты хыгъдæй сæ бон у бæрæг кæнын æппæт бæстæйы равдыстытæ, театртæ, музейтæ, кинозалтæ æмæ ахуырадон лекцитæ. Уæрæсейы культурæйы æмæ нымæцон райрæзты министрадты социалон проект парахатдæр кæны. Цæгат Ирыстоны «Пушкины картæ» сфидар кодтой 44 мин скъоладзау æмæ студентæй фылдæрæн. Бæлвырддæр радзурдзæн Хъайтмазты Дзерассæ.
Уырыссаг академион театры аншлаг. Спектакльмæ бакæсынмæ бирæ адæм æрбацыд. Се ‘хсæн бирæ фæсивæд. Спектакльмæ лæвар бакæсыны фадат сын ис программæ «Пушкины картæ»-йы фæрцы. Цориты Эльвирæ Пушкины картæйæ арæх фæпайда кæны театртæм, кинозалтæм æмæ музейтæм цæуынæн. Куыд зæгъы, афтæмæй уый хорз гæнæн у культурон мадзæлттæ бабæрæг кæнынæн æмæ миддуне хъæздыгдæр кæнынæн.
Ацы хъуыддаг тынг ахсджиаг у, зæгъы уырыссаг академион театры аивадон разамонæг Владимир Уваров. 2023-æм азы сентябрæй абоны онг культурон артдзæст Пушкины картæмæ гæсгæ бабæрæг кодта 20 мин адæймаджы онг. Федтой 300 равдысты бæрц.
«Пушкины картæ» у Уæрæсейы культурæйы æмæ нымæцон райрæзты министрадты социалон проект. Архайын райдыдта 2021-æм азы. Бæстæйы президенты указмæ гæсгæ рауагътой сæрмагонд картæ ног дизайны. Пушкины картæ райсын у 14-æй 22 азы онг кæуыл цæуы, уыцы фæсивæдæн. Уый тыххæй хъæуы «Паддзахадон лæггæдты» регистраци скæнын. Телефоны сæвæрын æфтуан «Паддзахадон лæггæдтæ Культурæ» æмæ сфидар кæнын Пушкины картæйы рауагъд. Картæ вæййы 2 хуызы: виртуалон æмæ пластикон. Пайда кæнын сæ ис иухуызон. Картæйы номинал у 5 мин сомы. Кинотеатртæм билеттæн ис лимит – 2 мин сомы. Иннæ фæрæзтæй ис спайда кæнын æндæр культурон мадзæлттæ бабæрæг кæнынæн.
Социалон программæ «Пушкины картæ»-йы нысан у рæзгæ фæлтæрæн аразын фадæттæ культурон мадзæлттæ бæрæг кæнынæн. Æмæ афтæмæй архайын, фæсивæды миддуне хъæздыгдæр кæныныл æмæ сæ интеллектуалон рæзтыл.
