Радио чи уарзы æмæ дзы йæхи чи ирхæфсы, ахæм адæм бирæ ис дунейы алы рæтты. Сты нæ республикæйы дæр. Алы бæстæйæн дæр ис йæхи нысан, уымæ гæсгæ радиоуарзджытæ базонынц
Мæскуыйы облæсты Кубинкæимæ Хъалаты Валерий скодта радиобастдзинад. Уыцы горæт у Дзæуджыхъæуæй дыууæ мин километры бæрц дарддæр. Ахæм бастдзинад саразын рауад сæрмагонд кусæнгæрзты руаджы. Уæвгæ радиойы уылæнты Валерий ис, 16 азы йыл куы цыд, уæдæй нырмæ. Уæд фыццаг хатт базыдта цы у радиоприемник, æмæ йæ хи къухæй саразæн кæй ис, уый.
Хъалаты Валерий, Уæрæсейы радиоуарзджыты цæдисы уæнг: «Ахуыр кодтон техникумы æмæ балхæдтон приемник. Уæд фыццаг хатт фехъуыстон уыцы хабæрттæ, тынг диссаг уыдис æмæ мæ бафæндыд уыцы хъуыддагмæ лæмбынæг æркæсын. Æрыгонæй уыцы хъуыддагимæ райдыдтон архайын. Ныр мыл цæуы бирæ азтæ, фæлæ нырмæ дæр уыцы хъуыддагимæ архайын. Мæ зæрдæмæ тынг цæуы. Бирæ адæмы базыдтон».
Радиойы уылæнтæ чи бауарзта æмæ ахæм хуызы йæхи чи ирхæфсы, уыцы адæмы нымæц бирæ у. Сты дунейы алы рæттæй. Афтæмæй алы бæстæйæн дæр ис йæхи нысан. Уымæ гæсгæ радиоуарзджытæ базонынц кæрæдзийы æмæ афтæмæй фæныхас кæнынц. Кæй зæгъын æй хъæуы, цæмæй адæймаг ацы хъуыддаджы архайа, уымæн æм хъуамæ уа сæрмагонд аппаратурæ, стæй, æнæмæнг, антеннæ. Зæгъæм, Хъалаты Валерий йæ хæдзары кæрты сæвæрдта, 30 метры йæ бæрзæнд кæмæн у, ахæм антеннæ.
Хъалаты Валерий, Уæрæсейы радиоуарзджыты цæдисы уæнг: «Æппæтæй дарддæр бæстыхай, кæимæ ныхас кодтон, уый уыдис Ног Зеланди. Уый ис 18 мин километры горæтæй. Æмæ уыцы ранимæ ныхас кодтон радиоуарзгимæ. Пайда æрмæстдæр зæрдæйæн, зоныс æй уыцы бæстæимæ радиобастдзинад скодтай. Ныхæстæ кодтон Клинтонимæ, Америкæйы президентимæ, Гельмут Шмидтимæ, ФРГ-йы канцлеримæ, зæрдæйæн æнцон вæййы, дæ бон бацис, уыцы бæстæимæ бастдзинад скæнын».
Ис ахæм бынæттæ, адæм уæвгæ кæм нæ цæрынц, кæнæ радиуарзджытæ кæм нæй. Уыцы бынæттæ уæлдай цымыдисаг сты, радиойы уылæнтыл чи архайы, уыдонæн. Æмæ семæ бастдзинад скæныны тыххæй радиоуарзджытæ къордæй ацæуынц уыцы бынатмæ æмæ фæныхас кæнынц иннæ адæмимæ. Афтæмæй, арæзт æрцæуынц алыхуызон ерыстæ дæр. Зæгъæм, æппæтæй фылдæр хатт чи сарæзта бастдзинад, адæм кæм нæ цæры, ахæм бынæттимæ. Æмæ кæд ныр, интернеты дуджы, бирæтæ ацы ирхæфсæн фæрæзы нысан кæронмæ не мбарынц, уæд радиоуарзджыты хъуыды ахæм нæу. Куыд зæгъынц, афтæмæй æнæнхъæлæджы цауты рæстæг, бастдзинады фæрæзтæ куы нæ кусой, уæд радиоуарзджыты аппаратурæйы руаджы ис фидар бастдзинад саразæн.
Гугкаты Иринæ
