Афтæмæй бæстон æркастысты, Сочийы ахуырадон центр «Сириус» куыд кусы, уымæ
Рæзгæ фæлтæрæн, курдиатджын сывæллæттæн æмæ фæсивæдæн æххуыс кæныны мадзæлттыл æрныхас кодтой Проектон офисы радон æмбырды. Амыдта йæ Битарты Вячеслав. Ахуырады æмæ наукæйы министр Людмила Башарина куыд фехъусын кодта, афтæмæй бæстон æркастысты, Сочийы ахуырадон центр «Сириус» куыд кусы, уымæ. Ахæм хуызы центр саразынмæ хъавынц нæ республикæйы дæр. Нысантæм гæсгæ, дзы ахуыр кæндзысты 5-11-æм къласы онг скъоладзаутæ. Уыимæ кусдзысты цалдæр хуызмæ гæсгæ: «Культурæ» æмæ «Наукæ». Сывæллæтты сæм исдзысты олимпиадæты хатдзæгтæм гæсгæ. Курдиатджын сывæллæттимæ кусынмæ райсдзысты куыд бынæттон педагогты, афтæ Уæрæсейы иннæ регионтæй ахуыргæнджыты дæр. Ахуырадон центры уыдзæн 50 бынаты. Кусдзæн Дзæуджыхъæуы рекреацион зонæтæй иуы — Доны станцæйы районы. Йæ территорийы нысан кæнынц футболон фæз саразын, баскетболй æмæ волейболæй хъазæн бынæттæ, стæй ботаникон цæхæрадон æмæ амфитеатр скæнын. Уæ зæрдыл уын æрлæууын кæндзыстæм, йе рвылазон ныстуаны Федералон æмбырдмæ Уæрæсейы Президент Владимир Путин фехъусын кодта, нæ бæстæйы ахсджиаг кæй у, сывæллæтты техникон, инженерон къордтæ æмæ центртæ æнтыстджынæй кæй кусынц, уый. Ахæм фæз Ирыстоны курдиатджын сывæллæттæн саразын кæй хъæуы, уый тыххæй та йæ ныстуаны загъта нæ республикæйы сæргълæууæг Битарты Вячеслав.
