Арæзт æрцыд 58-æм æфсады командæгæнджыты, инæлар Трошевы номыл фæсивæды патриотон хъомылады Фонды æмæ Уæрæсейы фысджыты цæдисы иумæйаг хъæппæрисмæ гæсгæ
Хъæбатырдзинады дæнцæгыл Фыдыбæстæмæ уарзондзинадыл ахуыр кæнын. Уыимæ чингуытæй æмæ газеттæй пайда кæнын. Рæзгæ фæлтæры патриотон хъомылады журналистты æмæ фысджыты ахадындзинадыл ныхас цыд офицерты Хæдзары æмбырды. Арæзт æрцыд 58-æм æфсады командæгæнджыты, инæлар Трошевы номыл фæсивæды патриотон хъомылады Фонды æмæ Уæрæсейы фысджыты цæдисы иумæйаг хъæппæрисмæ гæсгæ.
Дзæуджыхъæумæ ссыдысты делегацитæ Кæсæг-Балхъарæй, Ростовы æмæ Белгороды облæсттæй. Фембæлды архайджытæ уыдысты нæ республикæйы журналисттæ, фысджытæ, æхсæнадон архайджытæ æмæ æвзонг æфсæддонтæ. Уæрæсейы фысджыты Цæдисы разамынды сæрдар Николай Иванов куыд радзырдта, афтæмæй Цæгат Ирыстон хуымæтæджы нæ равзæрстой. Йæ хъуыдым гæсгæ нæ регион хъуыстгонд у хъæбатырты фæлтæрæй. Æмæ уыдоны тыххæй кæстæртæн дзурын у нæ алкæйы хæс дæр.
Зындгонд æфсæддон разамонæджы чызджы зæрдыл ма æрлæууыдысты Цæгат Ирыстоны журналисттæ. Уыдон ахсджиаг æмæ зын куыст бакодтой æппæт Кавказæн 90-æм азты. Куыд фехъусын кодта, афтæмæй информацион блокадæ йæ рæстæджы батыдта зындгонд журналист Таболты Иринæ. Фембæлды ма ныхас цыд дзыллон информацион фæрæзты ахадындзинадыл нæ бæстæйы зын рæстæджыты.
Газеттæ мыхуыры цыдысты Фыдыбæстæйы Стыр хæсты рæстæг дæр. Фембæлды ма презентаци скодтой фысджыты цæдисы уæнг Геннадий Алехины чиныгæн «Излом необъявленной войны. Первая чеченская». Авторы ныхæстæм гæсгæ, дзы бакæсæн ис канд хæсты хабæртты тыххæй нæ, фæлæ ма адæмы хъысмæтты тыххæй дæр.
