Уыимæ пайда кодта æрдзон æрмæгæй
Уæллаг Бирæгъзæнджы та ис æндæр арæзтад. Рагæй кæмæ бæллыд, ахæм хæдзар йæхи къухтæй сарæзта Гæцойты Павел. Уыимæ пайда кодта æрдзон æрмæгæй. Зæгъæм къултæ саив кодта хæххон цæуæгæдоны дуртæй, хæдзары хъæддзаума та сарæзта бынæттон хъæдæрмæгæй. Афтæмæй йæ хæдзар сси йæ фидар. Уымæй дарддæр ма Гæцойтæ дарынц фос æмæ ахсынц цыхт. Сæ цæхæрадоны та зайынц экзотикон зайæгойтæ: гранат, лимонтæ æмæ оливкæтæ.
Гæцойты Павел мидбылты худгæйæ йæ хæдзар хоны мæгуыры къона. Куыд радзырдта, афтæмæй сæ рæстæджы æнæхъæн бинонтæй Бирæгъзæнгмæ æрлыгъдысты Тибæй. Балхæдтой хæдзар, æмæ дзы сабыргай æрбынæттон сты. 7 азы размæ та сфæнд кодта йæ цæрæн бынатæн йе ддаг бакаст аивын. Сæрмагонд техникæйæ нæ пайда кодта, фæлæ йæ зæрдæмæ цы цыди, уый кодта.
Цымыдисаг уый у, æмæ Павел кæй у агроном, ома йæм аразæджы дæсныйад нæй. Ныртæккæ та у пенсиисæг, æмæ райдыдта, кæддæриддæр йæ зæрдæмæ чи цыди, уыцы куыстытæ кæнын. Йæ бинойнаг Светланæ та кæны хæдзары куыстытæ, фæлæ йæ цардæмбалы архайдæй дæр йæ зæрдæ райы.
Ацы хæдзар цымыдисаг кæсы Гæцойты сыхæгтæм, стæй Бирæгъзæнджы донгуырæнтæм чи фæцæуы, уыцы туристтæм дæр. Арæх ам бауыромынц, æмæ фæисынц сæ къамтæ. Бирæтæм ацы арæзтад фæкæсы рагон галуаны хуызæн. Хæдзары хицау зæгъы, ахæм хуызы йæ кæнын нæ фæнд кодта, æрмæст æй фæндыди рагон традицион хæххон архитектруæ равдисын. Уымæ гæсгæ пайда кодта дуртæй. Павел куыд зæгъы, афтæмæй арæзтадон æрмæг æвзарын хъæуы лæмбынæг.
Ацы хæдзарæй дарддæр ма Павел йæ кæрты аразы беседкæ. Æмæ ууыл дæр æрлæууынмæ нæ хъавы.
