Куыд фæбæрæг кодтой, афтæмæй район æххæст у транспортон æмæ энергетикон инфраструктурæйæ æмæ йын уый фæрцы ис хорз хъомыс промышленность æмæ хъæууонхæдзарады къабæзты инвестицион проекттæ сæххæст кæнынæн
Рахизфарсы районы социалон-экономикон райрæзты фарстатыл кусæг фембæлды рæстæг дзырдтой хицауады сæрдар Тускъаты Таймураз æмæ районы администрацийы сæргълæууæг Беркъаты Константин. Куыд фæбæрæг кодтой, афтæмæй район æххæст у транспортон æмæ энергетикон инфраструктурæйæ æмæ йын уый фæрцы ис хорз хъомыс промышленность æмæ хъæууонхæдзарады къабæзты инвестицион проекттæ сæххæст кæнынæн. Раппæлыны аккаг у лæггæдты къабаз дæр. Ныртæккæ районы инвестицион проектты руаджы ныссагътой дыргъцæхæрадæттæ, аразынц нартхорæфснайæн, стæй кусынц кæсагдарыны къабаз фæстæмæ сног кæныныл. Йæ тæмæны ис Беслæны хорйраджы комбинаты консервон заводы рацарæзт. Ныртæккæ та кусынц регионалон æмæ æппæтдуонеон æмвæзадыл логистон бастдзинад саразыныл. Беркаты Константины хъуыдымæ гæсгæ, уыцы проекттæ æххæстгонд куы æрцæуой, уæд уый хорзырдæм фæзындзæн æрмæст районыл нæ, фæлæ республикæйы иумæйаг райрæзтыл Уымæй уæлдай бынæттон цæрджытæн фæзындзæнис ног куысты бынæттæ. Уæлдай æргом аздæхтой федералон программæтæ æмæ национ проекттæ куыд æххæстгонд цæуынц, уымæ. Сæ фæрцы Беслæны аразынц фондзсæдæ фæндзай бынатæн скъола, Цæлыччы та дыууæсæдæ бынатæн. Уыдонимæ ма сывæллæтты рæвдауæндæттæ, Раздзоджы — фелшырон-акушерон пункт, хъазæн фæз сывæллæттæн, æрыгон техникты станцæ æмæ афтæ дарддæр. Тускъаты Таймураз Беркъаты Константинæн бабар кодта, цæмæй уæлдай æргом аздахой æнæниздзинадхъахъхъæнынады объектты арæзтадмæ, стæй цæмæй саразой æхсæнадон цæстдарды мадзæлттæ национ проекттæ куыд æххæстгонд цæуынц, уымæ.
