Цæгат Ирыстоны æртæ боны кусдзысты 309 æвзарæн участочы
Райдыдтой Паддзахадон думæмæ 9-æм æмбырды депутатты æвзæрстытæ. Цæгат Ирыстоны æртæ боны кусдзысты 309 æвзарæн участочы. 12 мин адæймагæй фылдæр балæвæрдтой курдиæттæ, цæмæй хъæлæс кæной, кæм сты, уыцы бынæтты. Афтæмæй пайда кæндзысты «Мобилон æвзарæджы» механизмæй. Республикæйы ныммыхуыр кодтой милуан бюллетенæй фылдæр. Фыццаг хатт фыст сты дыууæ æвзагыл – уырыссаг æмæ ирон. Алы æвзарæг дæр райсдзæн дыууæ экземпляры: иу æрвхуыз – федералон партион хыгъдæн, иннæ та кæрдæгхуыз – иумандатон зылды хъæлæс кæнынæн. Цæгат Ирыстонмæ ссыдысты 11 æппæтадæмон цæстдарæджы. Уыдонæй уæлдай ма уавæрмæ кæсдзысты мин æхсæнадон цæстдарæджы. æвзарæн участоктæ кусдзысты 18-æм, 19-æм æмæ 20-æм сентябры, райсомы 8 сахатæй – 20 сахаты онг. Политикон партитæй Цæгат Ирыстоны Паддзахадон думæмæ æвзæрстыты архайынц 8 кандидаты. Бестауты Сослан – Уæрæсейы Либералон демократон партийы номæй, Дудайты Чермен – Уæрæсейы Федерацийы коммунистон партийæ, Кучиты Алан – Комкоммæ демократийы партийæ, Мамыкъаты Алан – Уæрæсейы экологон парти «Зеленые»-йæ, Таймазты Артур – Парти «Иугонд Уæрæсе»-йæ, Фидараты Таймураз – «Фыдыбæстæйы» партийæ, Хуыбылты Яков «Уæрæсейы коммунистты» партийæ, стæй Цъыккаты Земфирæ – «Рæстдзæвин Уæрæсе»-йæ.
Хуссар Ирыстоны та абон цæуынц президенты рагагъоммæ æвзæрстытæ. æвзарæн бюллетены 4 кандидаты: Хъамболты Марат, Кокойты Зураб, Уалыты Мурат æмæ Кодоты Хъазыбег. æдæппæтæй байгом 75 æвзарæн участочы. Цæгат Ирыстоны чи цæры, уыцы Хуссар Ирыстоны граждантæн сæ бон у схæълæс кæнын 4 адрисмæ гæсгæ: Дзæуджыхъæуы Къозонты Сардионы æмæ Лев Толстойы уынгты. Алагиры, Алагирскийы уынджы æмæ Камбилеевскæйы Кучиты Юрийы уынджы. Иу æвзарæн участок ма кусдзæн Мæскуыйы.
