Фыццаг хатт æй фысдзысты 2 диалектыл – иронау æмæ дыгуронау. Текстытæ бакæсдзæн Хицауады сæрдар Такъоты Сергей. Ирон филологийы факультеты 4-æм курсы студенткæ Хоцаонты
Хоцаонты Алинæ, ЦИПУ-йы Ирон филологийы факультеты 4-æм курсы студенткæ: «Мæнмæ гæсгæ пайдайаг у. Мæн, куыд ирон филологийы студенткæйы, фæнды, цæмæй дзы фылдæр адæм архайа. Афтæмæй зонындзинæдтæ фылдæр кæнынц, стæй цæмæй æвзаг ма рох кæна, уый тыххæй».
Рагагъоммæйы бæрæггæнæнтæм гæсгæ глобалон диктанты архайдзæн 5 мин адæймаджы бæрц. Уый фаронимæ абаргæйæ у 2 хатты фылдæр. ЮНЕСКО-йы залы æрæмбырд уыдзæн 200 адæймагæй фылдæр. Иннæтæн сæ бон диктант ныффыссын уыдзæн интернеты фæрцы, уыдзæн дзы комкоммæ трансляци. Акци саразджыты ныхæстæм гæсгæ, ацы хъуыддагмæ ахæм цымыдисдзинад фæзынд, ныр диктант ирон æвзаджы 2 диалектыл арæзт кæй æрцæудзæн, уый руаджы дæр.
Тотраты Владислав, РЦИ-Аланийы ахуырады æмæ наукæйы министры фыццаг хæдивæг: «Ирон æвзаг у тынг аив. Фæнды нæ, цæмæй не `взаг ма фесæфа нæ, фæлæ ма фылдæр адæм цæмæй пайда кæной ирон æвзагæй. Ууыл архайæм».
Диктанты архайджыты зонындзинæдтæ бæлвырд кæндзысты филологон факультеты ирон æвзаджы æмæ литературæйы кафедрæйы кусджытæ.
Куыдзойты Анжелæ, ЦИПУ-йы филологон факультеты ирон æвзаджы æмæ литературæйы кафедрæйы сæргълæууæг: «Скъолаты ахуыргæнинæгтæн куыд фæбæрæг сæ куыстытæ, ам дæр афтæ. 5 райсдзæн æнæ рæдыдæй чи ныффысса, уый, кæнæ иу орфографион æмæ 2 пунктуацион рæдыды чи скæна, уый. Рæдыдтытæ цас фылдæр уой, уый бæрц бæрæггæнæн та уыдзæн ныллæгдæр».
Глобалон диктант арæзт цæуы республикон программæ «Ирон æвзаг» æххæстгæнгæйæ. Ахуырадон акцийы сæйраг нысан у – æхсæнады æргом мадæлон æвзаджы проблемæтæм раздахын.
Диктантты текстытæ цавæр уыдзысты, уый нырма не схъæр кодтой. Филологтæ куыд зæгъынц, афтæмæй зын нæ уыдзысты. Фæлæ бæрæг у, глобалон диктант чи амондзæн, уый. Дыууæ диалектыл дæр текстытæ кæсдзæн премьер Такъоты Сергей.
Хъайтмазты Дзерассæ
