Бирæ арфæйы ныхæстæ сыл сæмбæлд сæ бæрæгбоны, канд республикæйы цæрджытæй нæ, фæлæ ма се мкусджытæй сыхаг регионтæй дæр.
Рауагъдад «Ир» сбæрæг кодта йæ 95 азы юбилей. Бирæ арфæйы ныхæстæ сыл сæмбæлд сæ бæрæгбоны, канд республикæйы цæрджытæй нæ, фæлæ ма се мкусджытæй сыхаг регионтæй дæр. Сфæлдыстадон кусджыты бæрæгбоны уыд не сфæлдыстадон къорд дæр. Ныхасы бар Сосранты Жаннæйæн.
Национ наукон библиотекæйы республикон рауагъдад «Ир» сбæрæг кодта йæ равзæрды 95 азы юбилей. Йæ фæрцы рухс федтой аив чингуытæ. Зæгъын хъæуы уый, æмæ сæ фылдæр кæй сты мадæлон æвзагыл, æмæ уымæй ахсджиаг фæд ныууагъта ирон адæмы историйы. Ирыстоны фысджытæ цыдæриддæр хорзæй сфæлдыстой, уыдонæн се ’ппæты дæр дзыллæйæн базонын кодта рауагъдад «Ир». Чиныг аив кæныны хъуыддаг та ахæм къæпхæнмæ схызт, æмæ йæм Уæрæсейы бирæ регионты рауагъдадтæ бахæлæг кæндзысты. Рауагъдады кусджытæ сæ алыфарс æрбамбырд кодтой Ирыстоны курдиатджындæр нывгæнджыты æмæ уый фæрцы абон ирон чиныг йæ хуыз скалдта.
Рауагъдад «Ир»-æн ис, йæ сæр бæрзæндты кæмæй хæсса, бирæ ахæм цаутæ æрхæссæн. Йе ‘нтысджын куыстыл дзурæг у, цы чингуытæ рауагъта, уыдоны тыххæй Хетæгкаты Къостайы номыл Паддзахадон премитæ кæй райстой Мамсыраты Дæбе, Мæрзойты Сергей, Хъайтыхъты Геор, Плиты Харитон, Цæгæраты Максим, Цырыхаты Михал, Мыртазты Барис, Джыккайты Шамил, Ходы Камал, Дзасохты Музафер, Къомайты Риммæ, Плиты Грис, Мæхæмæтты Ахуырбег, Хъуысаты Генри, Хуыгаты Геор, Цгъойты Хазби, Кокайты Тотрадз.
Рауагъдады 95 азы кадæн мадзал хъæздыг уыд цымыдисаг, зонадон æрмæгæй. Мадзалмæ æрбацæуджытæ федтой «Ир»-ы куысты æмæ йæ равзæрды тыххæй видеоæрмæг дæр. Уæвгæ рауагъдадæн кæд йæ разамонджытæ ивд цыдысты, уæддæр йæ куысты сæйраг нысан алкæддæр уыд иу – хæрзхъæд æмæ рæстæджы домæнтæн дзуапп чи дæтты, ахæм продукци уадзын.
Цæгат Ирыстоны мыхуыры фæрæзты æмæ дзыллон коммуникациты комитеты сæрдар сæ юбилейы фæдыл раарфæ кодта «Ир»-ы кусджытæн, стæй сын радта кады гæххæттытæ. Рауагъдад «Ир» никуы дих кодта Ирыстон Хуссар æмæ Цæгатыл. Уымæн æвдисæн юбилеон мадзалы Хуссар Ирыстоны минæвæрттæ дæр зæрдиагæй кæй архайдтой, уый. Юбиляртæн раарфæ кæнынмæ ссыдысты сыхаг республикæты рауагъдæдты разамонджытæ æмæ кусджытæ дæр. Мадзалмæ æппæт æрбацæуджытæ дæр лæварæн райстой рауагъдады фæстаг чингуытæ. Стæй сын сæ зæрдæтæ бахъæлдзæг кодтой сфæлдыстады кусджытæ.
Мадзалы рæстæг ма рауагъдад «Ир»-ы разамынд сæрмагонд кады грамотæтæ саккаг кодтой сæ хуыздæр æмæ бæркадджындæр автортæн.
