Рейды хатдзæгтæ æхсæнадон кусджытæ арвитдзысты Цæгат Ирыстоны æнæниздзинадхъахъхъæнынады министрадмæ
Раздæр кæй байгом кодтой, уыцы фельдшерон-акушерон пункттæ феныны тыххæй та Æрыдоны районмæ кусæг балцы араст сты Æппæтуæрæсеон адæмон фронты регионалон хайады активисттæ. Федтой Рассветы æмæ Фыййаджыбылы медицинон пункттæ. Рейды хатдзæгтæ æхсæнадон кусджытæ арвитдзысты Цæгат Ирыстоны æнæниздзинадхъахъхъæнынады министрадмæ. Стæй ма дарддæр бæрæг кæндзысты хъæуты медицицнон лæггæдты хæрзхъæддзинад. Хæстæгдæр рæстæг нысан кæнынц Æрæфы, Алагиры æмæ Мæздæджы районтæ бабæрæг кæнын. Бокоты Виктория радзурдзæн бæлвырддæр.
Æрыдоны районы хъæу Рассветы ног фельдшерон-акушерон пункт кæй байгом, уый стыр цауыл банымайæн ис. Бынæттон цæрджытæ йæм рагæй æнхъæлмæ кастысты. Бирæ азты медицинон лæггæдтæ истой къуылымпытимæ.
Цин кæнынц Фыййаджыбылы цæрджытæ дæр. Ам дæр медицинон пункт æрæджы байгом. Дыууæ хъæуы объекты цæттæдзинад сбæрæг кæныны нысанимæ Рассветмæ æмæ Фыййаджыбылмæ кусæг балцы ацыдысты Æппæтуæрæсеон адæмон фронты регионалон хайады активисттæ. Мониторинг скодтой, æнæмæнг цы кусæнгæрзтæй хъуамæ ифтонг уой объекттæ, уымæн. Æмæ, æмтгæй райсгæйæ, æхсæнадон кусджытæ хъуыддæгтæй баззадысты разыйæ. Фельдшерон-акушерон пункттæ алцæмæйдæр сты ифтонг.
Æрмæст фиппаинæгтæ æрхастой иу хъуыддагмæ. Объектты нæ фаг кæнынц медицицнон кусджытæ. Зæгъæм Рассветы æмæ Фыййаджыбылы цæрджытæн лæггад кæны иунæг фельдшер.
Ацы фарста хъуамæ лыггонд æрцæуа цыбыр æмгъуыдмæ, загътой адæмон фронты активисттæ. Рейды хатдзæгтæ æхсæнадон кусджытæ арвитдзысты Цæгат Ирыстоны æнæниздзинадхъахъхъæнынады министрадмæ. Стæй ма дарддæр бæрæг кæндзысты хъæуты медицицнон лæггæдты хæрзхъæддзинад. Хæстæгдæр рæстæг нысан кæнынц Æрæфы, Алагиры æмæ Мæздæджы районтæ бабæрæг кæнын.
