Трассæ рæстæгæй-рæстæгмæ хъыгдард æййафы ламидæттæй
Регионалон фæндаг «Кавказ-Хурыхъæу-Малгобек-Мæздæг»-ыл дарддæр цæуынц быцæугæнæн къултæ арæзыны куыстытæ. Трассæ рæстæгæй-рæстæгмæ хъыгдард æййафы ламидæттæй. Специалисттæ рахастой уынаффæ, фæндаг хъахъхъæнæн конструкцитæй сфидар кæныны тыххæй. Куыстытæ райдыдтой 2024-æм азы, ныртæккæ æххæстгонд цæуы проекты æртыккаг къæпхæн. Быцæугæнæн къулты иумæйаг дæргъ уыдзæн 1750 метры бæрц. Фæндаггон куыстытæм цæст дары профилон комитет. æххæстгонд цæуынц ног национ проект «Цардæн инфраструктурæ»-мæ гæсгæ. Бæлвырддæр радзурдзæн Хъайтмазты Дзерассæ.
Къуылдымтæ фидардæр кæныны фæдыл фæндаггон куыстыты æртыккаг къæпхæн ныр райдыдта. Регионалон фæндаджы ацы хайыл специалистты хъæуы саразын дæллаг быцæугæнæн къул. Фæлæ уал раздæр цæттæ кæнынц фæндаджы бындур æфсæнбетон михтæ æвæрынæн. Сæрмагондæй уыдон суыдзысты фидæны конструкцийы бындур. Михты хсæн дæрддзæг уыдзæн 2 метры бæрц. Уый хъæуы конструкцийы фидардзинадæн. Автомобилон фæндаг «Кавказ-Хурыхъæу-Малгобек-Мæздæджы» 24-æм километрыл уыдзысты 68. æддæпæтæй та æртыккаг къæпхæнмæ гæсгæ нысангонд ис 210 михы.
Ахæм платформæ фæразы стыр уаргътæ æмæ æххæст кæны фæндаджы фидардзинад, зæгъынц специалисттæ. Быцæугæнæн фундаментæй арæхдæр фæпайда кæнынц хидтæ аразгæйæ, хъахъхъæнæн конструкцитæ кæнгæйæ та æрмæст уæлдай тæссаг хайæдты. Аразджытæ, зæгъæн ис, æмæ кусынц æхсæвæй-бонæй. Уый фæрцы æнтысы сæвæрын фылдæр михтæ. Сæ бæрзæнд у 9 метры онг.
Раздæр ацы уаццаг хъыгдард æййæфта æрдзон фæзындтыты тыхæй. Уæлдайдæр та дæргъвæтин тæрккъæвдаты фæстæ. æртыккаг категорийы регионалон фæндаг эксплуатацимæ радтой 5 азы размæ. Дзæуджыхъæу комкоммæ сбаста республикæйы æппæтæй дæрддзæф районимæ. Къуылымпыдзинæдтæ уайтагъд сæвзæрдысты фыццаг ламидæтты фæстæ. Сæ аххосаг – ацы территорийы геологийы хицæндзинæдтæ. Уæд рахастой, ламидæттæй тæссаг уаццæгты быцæугæнæн къултæ саразыны уынаффæ. Специалисттæ къæпхæнгай кусынц æртыккаг аз. Куыстытæ æххæстгонд цæуынц хицæн уаццагтыл – 21-æмæй 29-æм километры онг.
Быцæугæнæн къулты иумæйаг дæргъ уыдзæн 1750 метры. æртыккаг къæпхæны куыстытæм хауы саразын 420 метры. Конструкцийæ фæстæмæ ма аразджытæ сног кæндзысты асфальт æмæ фæндаггон нысантæ.
