Сцалцæг кодтой регионалон фæндæгты 70 километры
Регионалон проект «Фæндаггон хызæг» æххæстгæнæгæйæ, ацы аз республикæйы æппæт районты бакуыстой 26 объектыл, æмæ сцалцæг кодтой регионалон фæндæгты 70 километры. Æрыдоны районы, Мичуриныхъæуы иувæрсты цæуæг фæндаджы цалцæг хъуамæ фæуа 2021-æм азы. Уымæй дарддæр ма 5 километры уаццаг сцалцæг кодтой Æрыдон – Красногор – Транскаммæ фæндаджы. Участокыл фæллой кодтой фæндæгтæ цалцæджы æмæ аразæн 3-æгæм управленийы специалисттæ. Сæ разамонæг у Бототы Хъазыбег. Æрвылбон Цæгат Ирыстоны фæндæгтыл цæуæг шофыртæ куыд зæгъынц, афтæмæй фæстæг азты фæндæгты хæрзхъæддзинад зынгæ фæхуыздæр. Фæбæрæг кæнын хъæуы уый дæр, æмæ æппæт куыстытæ дзуапп кæй дæттынц нырыккон домæнтæн. Фæлæ, хъыгагæн, шофыртæн æмæ бæлццæттæн кæд уавæртæ арæзт цæуынц, уæддæр фæндæгты алыварс дзаг вæййынц бырæттæй. Æмæ ма уыдоны фæстæ æфснайыныл дæр сæ рæстæг бахардз кæнынц фæндаггон управленийы кусджытæ.
