Уый тыххæй абон пресс-конференцийы журналисттæн фехъусын кодтой «Фæдзæхстады агентады» генералон директоры хæдивæг Андрей Мельников æмæ Цæгат Ирыстоны национ банчы сæргълæууæг Дзиуаты Иринæ.
Фиддонтæ дæттыны хъууыддаг у æнцон. Кæд адæймагæн «Регионы рæзты банчы» уыд 700 мин сомы онг æхца, уæд æй ныр паспортимæ хъæуы бацæуын, банк-агент кæй схуыдтой, уырдæм. Уым сын се ‘хца ратдзысты проценттимæ. Дзæуджыхъæуы уыцы хъуыддаг æххæст кæнынц æртæ финансон организацийы: Æфснайæн, Хъæууонхæдзарадон æмæ Бастдзинады банктæ. Беслæны æмæ Елхоты кусдзысты Æфснайæн æмæ Хъæууонхæдзарадон банктæ, Алагиры, Æрыдоны, Камбилеевкæйы æмæ Мæздæджы та æрмæстдæр Хъæууонхæдзарадон банк. Ныртæккæ банкты филиалты арæзт цæуынц æппæт уавæртæ, цæмæй адæм æнæ къуылымпытæй, фыццаджыдæр, райсой сæ пенситæ æмæ мызд. Рады лæууын сæ цæмæй ма хъæуа, уый тыххæй та сæ курынц ма тагъд кæнын. Уымæн æмæ фиддонтæ дæтдзысты, цалынмæ «Регионы рæзты банк» кæронмæ æхгæд не ‘рцæуа, уæдмæ. Уый та бацахсдзæн дыууæ азы бæрц. Агентады æхца се ‘ппæтæн дæр сфаг уыдзæн, загъта Андрей Мельников. Паддзахадон корпорацийы фонд у 220 миллиард сомы. Куыд нысан кæнынц, афтæмæй уал фыццаг къуыри адæмæн фæстæмæ раздахдзысты сæ фæрæзты 95%. Æдæппæтæй та агентады бафидын хъæуы 3 миллиарды æмæ 370 милуан сомы.
