Æрныхас кодтой дыууæ регионы алы къабæзты фидæны æмгуыстады рæзтыл
Регионы разамонæг Сергей Меняйлойæн кусæг фембæлд уыд Запорожьейы облæсты губернаторы хæдивæг Роман Батршинимæ. Æрныхас кодтой дыууæ регионы алы къабæзты фидæны æмгуыстады рæзтыл. Раздæр уый фæдыл бафыстой дыууæвæрсыг бадзырд. Цæгат Ирыстон æртыккаг аз æххуыс кæны Запорожьейы облæсты Черниговы муниципалон зылдæн. Кæнынц рацарæзты куыстытæ, бындуронæй цалцæг кæнынц дондзæуæн системæ, сывæллæтты рæвдауæндæттæ æмæ скъолатæ. Уымæй дарддæр нæ республикæ зонындзинæдты Бонмæ балæвар кодта ахуыргæнæн чингуытæ, цæстуынгæ æрмæг, спортивон æмæ æндæр кусæнгæрзтæ. Цæгат Ирыстоны сæрдыгон лагерьты сæ фæллад суагътой Запорожьейы облæстæй дæсгай сывæллæттæ. Роман Батршин Цæгат Ирыстоны сæргълæууæгæн загъта бузныг, ахæм алывæрсыг æххуысы тыххæй. Ахсджиаг нын у, уæ республикæ нын зын сахат æххуысы къух кæй бадардта, уый – загъта Запорожьейы облæсты губернаторы хæдивæг. Уæ зæрдыл уын æрлæууын кæндзыстæм, раздæр æппæтадæмон экономикон форумы фæзы Сантк-Петербурджы Сергей Меняйло æмæ Запорожьейы облæсты губернатор Евгений Балицкий бафыстой дыууæвæрсыг æмгуыстады бадзырд, базарадон-экономикон, наукон-техникон æмæ социалон-культурон къабæзты.
