Санитарон-эпидемиологон службæйæ куыд хъусын кæнынц, афтæмæй нæ республикæйы ацы азы райдайæнæй нырмæ фадынæгæй фæрынчын сты 14 адæймаджы. Æмæ кæд нырма эпидеми у,
«Фадынæг, у хуымæтæг хæцгæ низ, фæлæ йын ис тæссаг фæстиуджытæ», – зæгъынц дохтыртæ. Уымæ гæсгæ адæмы хъæуы вакцинаци скæнын, цæмæй сæхи бахъахъхъæной вирусæй. Ныртæккæ ацы мадзæлттæ арæзт цæуынц профилактикон прививкæты национ къæлиндармæ гæсгæ. Бæззаты Алыксандр дæр æрбацыд Дзæуджыхъæуы 1-æм поликлиникæмæ, цæмæй скæна вакцинæйы укол.
Бæззаты Алыксандр: «Фехъуыстон ацы вирусы тыххæй, æмæ мæхи бахъахъхъæныны тыххæй æрбацыдтæн æм скодтон привикæ».
Санитарон-эпидемиологон службæйæ специалисттæ куыд зæгъынц, афтæмæй ацы азы райдайæнæй республикæйы бæрæггонд æрцыд 14 рынчыны. Се ппæт дæр сты хистæр кары адæм. Фæлæ ныртæккæ республикæйы эпидеми кæй ис, уый зæгъæн нæй.
Фадынæгæй прививкæтæ кæнынц сывæллæттæн дæр, æмæ хистæр кары адæмæн дæр. сывæллæттæн æй фæкæнынц 1 æмæ 6-аздзыдæй. Хистæртæй та, фадынæгæй рынчын чи нæ уыд æмæ 18-æй 35 азы онг кæуыл цæуы, уыдонæн. Дохтыртæ куыд зæгъынц, афтæмæй ацы уколы фæстæ адæймаг райсы иммунитет 10 азмæ.
Специалисттæ сидынц адæммæ, цæмæй се ппæт дæр скæной прививкæтæ, æмæ низ дарддæр ма парахат кæна. Уæвгæ, фыццаг хатт Цæгат Ирыстоны фадынæг бæрæггонд æрцыд ивгъуыд æнусы, 50-æм азты. Уæдæй нырмæ цæуы стыр куыст, низ скуынæг кæнынæн. Зæгъын хъæуы уый, æмæ 70-æм азты уыцы хъуыддаг бантыст. Фæлæ та ногæй фадынæг фæзынд 2004-æм азы æмæ уæдæй нырмæ дохтыртæ сбæрæг кæнынц ахæм цаутæ.
Гадзиаты Галинæ, Роспотребнадзоры цæгатирыстойнаг управленийы разамонæджы хæдивæг: «Бæрæггæнæнтæ абаргæйæ, кæд Уæрæсейы 100 мин адæймагæй фæрынчын вæййы 1 æнæхъæн æмæ 45 сæдæйæм хайы проценты, уæд нæ республикæйы та 100 мин адæймагæн фæрынчын вæййы йæ 9 проценты».
Вирусы ныхмæ тох кæнæн ис æрмæстдæр вакцинацийы руаджы»,- зæгъынц дохтыртæ. Ацы хъуыддаг бæрæггонд у наукон иртæстытæй.
Къорнаты Замирæ, Дзæуджыхъæуы 1-æм поликлиникæйы эпидемиолог: «Ацы низæй чи фæрынчын вæййы, уыдоны фæхицæн кæнын хъæуы иннæ адæмæй. Хицæн бынаты кæнæ рынчындоны сæ хъæуы дзæбæх кæнын. Цæмæй рынчынтæ бирæ ма уа, уый тыххæй хъæуы прививкæтæ кæнын, стæй хъуамæ сæхи хъахъхъæной. Уымæн æмæ бирæ адæм куы фæрынчын вæййын, удæ ма æндæр хуызы низтæм дæр рахизы. Вирус йæхæдæг тæссаг нæу адæймагæн, тындæр тæсаг сты йæ фæстиуджытæ – рæуджыты низтæ, менингиттæ. Æмæ нæ уымæй бахъахъхъæнын хъæуы адæмы».
Дохтыртæ куыд зæгъынц, афтæмæй вирус у тынг тыхджын, нæ амæлы 80 градусы уазалы дæр. Уымæ гæсгæ, профилактикон мадзæлттæн ис стыр ахадындзинад.
Гугкаты Иринæ
