Республикæйы фæндæгтыл æрвылбон цæуы сæдæ æвдай мин машинæйы. Уыдонæй алкæй хицау дæр хъуамæ фида транспортон хъалон. Уыцы хъалон нымад цæуы цалдæр къæпхæнмæ гæсгæ.
Фæстаг рæстæг æвдисæн стæм ахæм хъуыддагæн æмæ фылдæр хатт машинæ æрмæст транспортон фæрæз нæ вæййы, фæлæ зынаргъ дзаума. Алчидæр бæллы фæсарæйнаг машинæ балхæнынмæ. Паддзахадон автоинспекцийы йæ хыгъды æвæрынмæ куы бацæуынц, уæд та райдайынц сæ сагъæстæ. Машинæ æлхæнгæйæ сæ арæх ферох вæййы иннæ фиддонтæй уæлдай ма сæ транспортон хъалон фидын хъæудзæн, уый. Ныртæккæ Цæгат Ирыстоны паддзахадон автоинспекцийы хыгъды ис 170 000 машинæйæ фылдæр. Æмæ алы машинæйы хицау хъуамæ фида хъалон.
Хæдарцаты Аслæнбег, РЦИ-Аланийы парламенты бюджеты, хъалонты, исбоны æмæ кредитон организациты комитеты сæрдар: «Алы машинæйы хицау дæр фиддæн хъалон. Æмæ цас зынаргъдæр æмæ хуыздæр уа йæ машинæ, уый бæрц хъалон уыдзæн бæрзонддæр. Уым ногæй ницы ис. Раздæры азты дæр, ивгъуыд рæстæджы дæр ма зынаргъ бæх кæмæн уыд, уымæн йæ саргъ дæр хуыздæр уыд. Æмæ зынаргъдæр уыд. Фылдæр ын хъуыд. Афтæ машинæтимæ дæр».
Хъалоны бæрц нымад цæуы цалдæр къæпхæнмæ гæсгæ. Фæбæрæг ыл вæййы республикæйы фæндæгтыл машинæты нымæц дæр. Рог машинæты хицæуттæ хъалон фиддзысты, иннæ регионты куыд у, уый бæрц. Фæлæ уæзласæн æмæ зынаргъ фæсарæйнаг машинæты хицæутты фидын бахъæудзæн дзæвгар фылдæр. Иу бæхы тыхæн 45 сомы. Иннæ регионтимæ абаргæйæ – фылдæр. Уымæй уæлдай Цæгат Ирыстоны транспортон хъалон фидгæйæ, ис иу ногдзинад.
Хæдарцаты Аслæнбег, РЦИ-Аланийы парламенты бюджеты, хъалонты, исбоны æмæ кредитон организациты комитеты сæрдар: «Бафтыдтам иу ахæм хабар. Машинæйыл 5 азæй фылдæр куы цæуа, уæд ын йæ хъалон кæндзыстæм æрдæг къаддæр. Уый раст у. æрмæстдæр мæмæ ис ахæм курдиат, цæмæй шофыртæ афоныл фидой сæ хъалонтæ. Уыцы хцатæй мах зилдзыстæм фæндæгтæм, рæсугъд сæ кæндзыстæм. Исты дзæбæх хъуыддæгтæ араздзыстæм».
Федералон хъалонисæн службæйы хатдзæгтæм гæсгæ, 2012 азы транспортон хъалон æрæмбырд кодтой 56 милуан сомы. Фæлæ шофыртæ кæд хъалон фидынц, уæддæр сæ бирæтæ не мбарынц, цы æхца æрæмбырд вæййы, уыдон цы фæвæййынц, уый.
Засеты Руслан – машинæйы хицау: «Транспортон хъалон фидæм, куыд æмбæлы уыцы хъуыддæгтæ кæнæм. Фæлæ мæ фæндид базонын кæм куыд зилын фæндæгтæм, уый. Кæмдæрты хорз фæндæгтæ скодтой, зæрдæ рæвдауынц. Фæлæ ма бирæ æвзæр фæндæгтæ ис. Æмæ цас фæзындзысты нæ фиддонтæ фæндæгты уавæрыл, уый нæ фæндид зонын. Фæлæ фендзыстæм, кæд хæстæгдæр рæстæг нæ фæндæгтæ иууылдæр цалцæггонд æрцæуиккой».
Шофырты ныхæстæм гæсгæ ис, хорз кæй сцалцæг кодтой, ахæм фæндæгтæ. Арæхдæр центры. Фæлæ ис ахæмтæ, æмæ сыл шофыртæ цæуын дæр нæ фæуæндынц. Уый зонгæйæ, шофыртæй чидæртæ сæхи æмбæхсынц хъалон фидынæй. Уыдонимæ тох кæндзысты УФ-йы закъонмæ гæсгæ. Æфхæрд цæудзысты суанг уголовон æгъдауæй дæр.
Зыхъуаты Жаннæ
