100 мин сомæй фылдæр хæс кæмæн ис, уыды абонентты нымæц республикæйы у мины бæрц. Семæ специалисттæ æрвылбон кусынц.
Дуары хостмæ ничи ракаст. Куыд рабæрæг, афтæмæй хæдзары хицæуттæ сæхимæ не сты. Фæлæ уый газы кусджыты куыст нæ къуылымпы кæны. Гончаровы уынджы 184 хæдзары хицау газæн дары 200 мин сомæй фылдæр. Уымæ гæсгæ газы хæтæл лыггонд æрцыд.
Ахæм уавæр ис Æрыдойнаг уынджы дæр. Ам хæдзары хицау бынаты разынд. Фæлæ видеокамерæмæ дзурын не сразы. Уыимæ йæ ныхæстæм гæсгæ, 200 мин сомы бæрц хæс кæй дары, уый тыххæй нæ зыдта. Куыстуат «Газпром газораспределение Владикавказ»-ы куыд зæгъынц, уымæ гæсгæ, уый афтæ нæу.
Хъараты Родион, æнæххæстбарджын æхсæнад «Гарзпром газораспределение Владикавказ»-ы Дзæуджыхъæуккаг филиалы директор: «Газæн афойнадыл нæ фыста. Цалдæр хатты йын йæ хæсы тыххæй фехъусын кодта контролер. Райста хъусынгæнинаг «Уæрæсейы почтæйæ» дæр. Уым фыст уыдис, цæмæй йæ хæс бафида, науæд æй артагæй кæй нал æххæст кæндзысты, уый тыххæй».
Куыстуаты бæрæггæнæнтæм гæсгæ ацы адрисы фæстаг хатт газæн фыст уыдис 2011-æм азы, августы. Хæдзар артагæй ма æххæст кæнын зын уыд, уымæн æмæ ма ацы линийыл уыд 2 абоненты. Уыдоны æндæр хæтæлтæм куы баиу кодтой, уæд бантыст æрмæстдæр хæсджыны газ алыг кæнын.
Хæсджынты газæй хицæн кæнын райдыдтой февралы. Уазæлтты рæстæг ацы куыст нæ кодтой, цæмæй системæ ма ныссæла, уый тыххæй.
Газæн 100 мин сомæй фылдæр хæс чи дары, уыдон республикæйы сты иу мин абоненты бæрц. Сæ иумæйаг хæс у 140 милуан сомы.Алы бон ацы фарстайыл куыст цæуы. Газы организациты кусджытæ куыд зæгъынц, афтæмæй сбæлвырд кæндзысты алы хæсджыны дæр.
