филиал вгтрк государственная телерадиовещательная компания “Алания”

Республикæйы хицауады сæрдар Тускъаты Таймуразы разамындæй цы æмбырд ацыд, уым фыццаградон фарстатæй иу уыд – бюджетон фæрæзтæ куыд хардзгонд цæуынц, уый.

Финансты министрады кусæг къорды уæнгтæ сæ цæст дарынц ацы фарстамæ. Тускъаты Таймураз куыд загъта, афтæмæй ацы азы бюджетон нысантæ хъæуы хорз сæххæст кæнын, стæй хъалонтæ æмæ æндæр æфтиæгтæ хынцгæйæ, сбæрæг кæнын фидæны азы куыст. Хицауады сæрдар ма фæнысан кодта, муниципалитеттæ кæй не ххæст кæнынц, рагацау цы снысан кæнынц, уыцы хæстæ, æмæ афæдзы кæрон финансты министрадмæ фыссынц, уæлæмхасæн фæрæзтæ радих кæныны тыххæй курдиæттæ. Ахæм фæтк хъæуы аиуварс кæнын, æмæ æппæт районтæ хъуамæ бацæттæ кæной сæрмагонд паспорттæ. Уым хъуамæ æвдыст цæуа, æхца цæуыл схардз кодтой, уый. Ныхас цыд, хъармгæнæн рæстæг куыд арвыстам, æмæ фидæны ацы къабазы ахсджиаг цавæр фарстатæ сты, уыдоныл. Районты сæргълæуджытимæ ныхас цыд видеобастдзинады фæрцы. Афтæ Алагиры сæргълæууæг Бутаты Арсен базонгæ кодта «Уыналæй Уæллаг Фыййагдонмæ» газы хæтæл æнæкъуылымпыйæ уагъд кæй цæуы. Хицæн ныхас цыд фæндæгты æдасдзинадыл. Конкурсмæ гæсгæ фидаргонд æрцыд, Заманхъулы культурæйы хæдзар чи араздзæн, уыцы подрядон организаци. Рады ма лæууынц Цæлыкк æмæ Цыколайы культурæйы хæдзæрттæ.