Ацы азы онг уыцы аппараттæ ивыны кæнæ цалцæг кæныны хæстæ æххæст кодта социалон фæдзæхстады фонд. Ныр сын ахæм бар нал ис. Лæггад кæнынц, æрмæст ацы ведомствойы фæрцы
Ацы сывæллæттæн дзурын базонын – стыр æнтыстдзинад у. Илья Кудренкойыл 6 азы цæуы. Йæ райгуырдæй фæстæмæ æвзæр хъусы. Дохтыртæ йын сæвæрдтой диагноз – 4-æм къæпхæны сенсоневралон къуырмадзинад. Лæппу хъусы, йæ алыварс цы цæуы, уый, фæлæ йæ бон хъæугæ зæлтæ раиртасын нæу. Ахæм сывæллæттæ нымад вæййынц гобитыл. Фæлæ ныр кохлеарон имлантацийы системæйы фæрцы Илья хъусын райдыдта.
Дзурæн процессор ивын фæхъæуы 5 азы 1 хатт. Ацы азы онг уыцы аппараттæ ивыны кæнæ цалцæг кæныны хæстæ æххæст кодта социалон фæдзæхстады фонд. Ныр сæм Уæрæсейы фæллойы æмæ социалон рæзты министрадæй æрцыд фыстæг. Уым нысангонд ис, ведомствойæн ахæм бар кæй нал ис, уый. Амæй фæстæмæ лæггад кæнынц, æрмæст уыдоны фæрцы имплантанттæ чи райста, уыцы сывæллæттæн. Ныййарджытæ тыхсынц, ацы хъуыддаг æвзæрырдæм фæзындзæн сабиты æнæниздзинадыл.
Роман Кудренко, лæмæгъхъусæг адæмы цæгатирыстойнаг æхсæнадон организаци «Зæлты дунейы» сæрдар: «Ребенок если не слышит в течение недели, если аппарат не работает, то у него слухо-речевые навыки падают до 30%. Это мнение специалистов. Получается, что все труды педагогов, ученых, которые это разработали, весь комплекс мероприятий он как бы идет в никуда».
Ныййарджыты ма тыхсын кæны ноджыдæр иу хъуыддаг. Афæдз иу хатт дзурæн процессор фæхъæуы рацаразын. Уыцы процедурæ бацахсы сахаты бæрц. Уый тыххæй æнæниздзинадхъахъхъæнынады министрад радих кæны квотæтæ. Уыдонмæ гæсгæ сывæллоны æмæ ныййарæджы арвитынц Мæскуымæ.
Гуыдиаты Мæдинæ: «Мæнæн дæр мæ сывæллон нæ хъусы, афæдз æмæ йыл 7 мæйы цыд, афтæмæй нын операци скодтой. Афæдз иу хатт цæуæм Мæскуымæ, цæмæй нын аппараты куыст банывыл кæной. Зын у цæуын алы хатт. Фæнды нæ, цæмæй специалисттæ ардæм цæуой. Махæн дæр æнцондæр уыдзæн, министрадæн дæр асламдæр. Фæндид нæ, цæмæй афæдз иу хатт цæуой ардæм».
Республикæйы кохлеарон имплантацийы системæимæ ис 60 сывæллоны бæрц. Æнæниздзинадхъахъхъæнынады министрады æххуысæй чи райста аппараттæ, уыдонæн чи лæггад кæндзæн, уый ныры онг бæрæг нæма у.
Ныртæккæ процессор баивынмæ æмæ сцалцæг кæнынмæ æнхъæлмæ кæсынц 9 сывæллоны. Аппарат банывыл кæнынæн хъæуы 30 мин сомы бæрц. Ацы хъуыддаджы сын æххуыс кæнынц хæрзаудæн организацитæ. Уæззаудæр уавæры сты, ног процессортæ кæй хъæуы, уыдон. Иу аппараты аргъ у 400-йæ 650 мин сомы онг».
Республикон ведомствоты куыд зæгъынц, афтæмæй æнхъæлмæ кæсынц федералон центртæй амындтытæм. Процессортæ рацарæзты хъуыддаджы тыххæй та фæллойы æмæ социалон рæзты министрады бафæдзæхтой, ныртæккæ уыцы фарстайыл кæй кусынц, уый.
Хъайтмазты Дзерассæ
