Арæзт æрцыд ныр 2-æм хатт Уæрæсейы адæмон артисткæ, оперæ æмæ балеты театры аивадон разамонæг Гергиты Ларисæ. Ацы хъуыддаджы йынстыр æххуыс бакодтой бæстæйы æмæ
2 сахаты æнæрлæугæйæ сценæйы хъазы æрмæстдæр иу актер. Хуымæтæг дæкорациты æмæ йæ æгæрон курдиаты фæрцы Олег Попов аивадуарзджыты фестын кодта Одессæйы уынгты. Кæсджыты æппæтуæрæсеон конкурсы лауреат, моноспектакльты фестиваль «Монокль»-ы номинант цæгатирыстойнаг театралон публикæйæн равдыста Исаак Бабелы «Одессаг радзырдтæ».
Цалдæр минуты фæстæ петербургаг кæсæджы сценæйы раивдзæн Стыр театры балеты артисткæ, не мзæххон Виктория Литвинова. Фыццаг хатт аивадуарзджытæн æвдыст æрцыд монобалет «История, которой не было». Фыст æрцыд сæрмагондæй фестивальмæ. Актрисæ куыд зæгъы, афтæмæй сценæйы иунæгæй архайын æнцон нæу.
Виктория Литвинова, паддзахадон академион Стыр театры балеты артисткæ: «Хъæуы дæ аивадуарзджытæм де `нкъарæнтæ фæхæццæ кæнын. Æнæмæнг, спектаклы куы фæхъазыс, уæд дын вæййы бæлвырд сурæт. Дæ фарсмæ ма вæййынц æндæр хъайтартæ дæр. Уыдон дын феххуыс кæнынц. Ам та архайыс иунæгæй. Мæ зæрдæ дарын, театрдзаутæ мæ кæй бамбардзысты, ууыл. Æцæгдæр, тынг зын жанр у».
Моноспектакльты фестиваль «Арт-Соло» республикæйы арæзт æрцыд ныр дыккаг хатт. Йæ саразджытæ куыд зæгъынц, уымæ гæсгæ театры ацы жанр абон парахат нæу, бирæтæн зын бамбарæн у. Сфæлдыстадон форумы хæс у – театрдзаутæм ацы аивадмæ цымыдисдзинад гуырын кæнын.
Гæлæуты Анатолий, Цæгат Ирыстоны Оперæ æмæ Балеты театры директор: «Ацы фестиваль тынг ахъаззаг у нæ дзыллæйæн. Интеллектуалон æгъдауæй цымыдисаг фæрæзтæй пайда кæнынц, ардæм цы артисттæ æрцæуынц, æмæ уый нымайын хъæуы. Сæ къæпхæн тынг бæрзонд æвæрд у. Цы æрмæг æрбаласынц, уыдон, мæнæ сыл абон ахудæм, ахæм не сты, фæлæ арф хъуыдыйыл баст сты».
Фæлæ уæддæр ацы жанр Дзæуджыхъæуы ссардта йæхи театрдзауты. Фестивалы программæмæ гæсгæ æдæппæтæй æвдыст æрцæудзæн 5 спектаклы.
Фестиваль «Арт-Соло» æххæстгæнгæйæ оперæ æмæ балеты театры сценæйы се сфæлдыстад æвдисынц Мæскуыйы, Санкт-Петербурджы æмæ Башкирийы артисттæ. Хæстæгдæр бонты ма æвдыст æрцæудзæн ноджыдæр 2 моноспектаклы «Шестое чувство» æмæ «Во весь рост». Сфæлдыстадон форум фæуыдзæн 17 декабры.
Хъайтмазты Дзерассæ
