филиал вгтрк государственная телерадиовещательная компания “Алания”

Æмбырд амыдта Хицауады сæрдар Такъоты Сергей. Æрдзырдтой æнæниздзинад хъахъхъæнынады кусæндæтты архайдыл, цæмæй рæзгæ фæлтæры ‘хсæн инвалидты нымæц къаддæр кæна. Ныртæккæ Цæгат Ирыстоны сывæллæттæй инвалидтыл нымад сты 3135. Такъоты Сергей бадомдта, цæмæй профилактикон мадзæлттæ уой ахадгæдæр, стæй кусæндæтты разамонджытæ сæ хæстæ æххæст кæнынмæ бæрнондæр цæстæй кæсой. Ныхас цыд профессионалон ахуырадыл дæр. Уæлдæр скъолаты ныртæккæ ахуыр кæнынц 146 инвалиды. Хъæугæ мадзæлттæ конд цæуынц, цæмæй къаддæр къуылымпыдзинæдтимæ æмбæлой. Уыимæ ма хъæуы дарддæр бакусын, цæмæй кусæндæттæ æнцонвадат уой, йе `нæниздзинад хъыгдард кæмæн у, уыцы адæмæн. Совет ма æркаст инвалидты æхсæнадон иугæндты æмæ хицаудзинады органты æмгуыстадмæ. Иумæйаг архайды фæрцы фарстатæ лыггонд цæуынц æнæкъуылымпыйæ.

Айларты Зæлинæ, социалон фæдзæхстады фонды Цæгатирыстойнаг хайады разамонæг: «Нæ республикæйы, техникон реабилитацийы фæрæзтæ кæй хъæуынц, уыдоны нымæц у 90 минæй фылдæр. 26 мин адæймагæй мах алы аз дæр райсæм курдиат. Ацы азæн йе ‘мбис фæци. Цы курдиæттæ райстам, уыдонæй алкæмæ дæр æркастыстæм. Закъон куыд амоны, афтæмæй алы курдиатмæ дæр хъуамæ æркæсæм 15 боны æмгъуыдмæ. Хъыгагæн, Мæскуыйæ æхца алкæд афоныл не ‘рцæуынц, æмæ бакъуылымпы вæййæм. Æнæуи та æппæт хъуыддæгтæ кæнæм раст».