филиал вгтрк государственная телерадиовещательная компания “Алания”

Республикæйы Сæргълæууæг Битарты Вячеслав абон бабæрæг кодта куыстуат «СпецЭкосервис».

Организаци дзуапп дæтты Дзæуджыхъæуы сыгъдæгдзинадæн. Йæ кусджытæ алы бон дæр рацæуынц горæты фæндæгтæм, цæмæй йæ ссыгъдæг кæной бырæттæй. Æдæппæтæй куыстуаты фæллой кæны 500 адæймаджы. Кусæг балцы ма уыд Дзæуджыхъæуы администрацийы сæргълæууæг Æлбегаты Барис дæр. «CпецЭкосервис»-ы разамонæг Хайманты Владимиримæ æркастысты æппæт территоримæ, аргъ скодтой æфснайæн техникæйæн дæр. Битарты Вячеславы хъуыдымæ гæсгæ, зымæгмæ цæттæ кæнын хъæуы рагацау. Фæлæ куыстуаты разамонæг куыд загъта, афтæмæй, цæмæй æппæт домæнтæ æххæстгонд æрцæуой, уый тыххæй хъæуы 5 хатты фылдæр техникæ. Кусджыты архайд у зын, сæ мызд та ныллæг. Уый аххосæй ног кусджыты агурын арæх фæхъæуы. Республикæйы разамонæг администрацийæн бабар кодта мæйы мгъуыдмæ сæрмагонд пълан саразын, уавæр фæхуыздæр кæныны тыххæй. Фыццаджыдæр уал хъæуы хæрæндон, техникон бынæттæ æмæ хинайæнтæ саразын. Советон рæстæджы уынгтæ чи фснайдта, уыдонæн лæвæрдтой цæрæн бынæттæ. Ныртæккæ ахæм куыст нал цæуы. Æххæстæй уыцы системæ раздахын нæ бантысдзæн, фæлæ хуыздæр кусджыты хорзæхджын кæнæн уыдзæн. Ацы фарстамæ æркæсдзысты бæстон. Бакусдзысты ма экологон хъомылады программæйыл.