Уымæн ис цалдæр аххосаджы. Фæфылдæр ахуырдзауты нымæц. Ахуырады управленийы куыд загътой, афтæмæй 100 чиныджы систой сæрмагонд ахуыргæнæн литературæйы номхыгъдæй. Уымæ гæсгæ, алы скъолайы дæр агурынц уавæр сраст кæныны мадзæлттæ. Зæгъæм, Дзæуджыхъæуы 13-æм скъолайы библиотекæтæ ахуыргæнæн æрмæг ивынц иннæ ахуыргæнæндæттимæ.
Немыцаг æмæ англисаг æвзæгтæй чингуытæ. Уыимæ сын сæ автортæ æмæ рауагъдадтæ дæр схæццæ кæнæн нæй. Пухаты Мæдинæ чингуыты дуканийы фæлхасгæнæг фыццаг аз нæу. Йæ 2-æм къласы ахуырдзау чызгæн дзы ахуыргæнæн æрмæг æлхæны ныр дыккаг аз. Куыд зæгъы, афтæмæй раздæр сæ зæрдæ дардтой лæывар чингуытыл.Сунжæйы 9 къласон скъолайы сын сæ хъуамæ афæдзы райдиан радтаиккой. Фæлæ сентябры кæрон рабæрæг, се нъæлмæ каст дзæгъæлы кæй у, уый.
Ахæм уавæры сты æндæр мингай ныййарджытæ дæр. Уавæр карздæр у Дзæуджыхъæуы. Бирæ скъолаты дзы нæ фаг кæнынц чингуытæ. 13-æм скъолайы куыд зæгъынц, афтæмæй скъоладзаутæ фæфылдæр сты, æмæ уый тыххæй фарон цы чингуыты комплекте балхæдтой, уыдон нал сфаг сты.
Уавæр сраст кæнынæн ссардтой иу гæнæн. Скъолаты библиотекæтæ ахуыргæнæн æрмæг ивынц иннæ ахуыргæнæндæттимæ. 13 скъолайæн ацы ногдзинад тынг феххуыс. Фæлæ стырдæр скъолатыл уый хорзырдæм нæ зыны. Фæлæ Дзæуджыхъæуы ахуырады управленийы æмбарын кæнынц, куылымпы æрмæст кълæстæ кæй фæфылдæр сты, уый кæй нæу, уый.
Тменаты Алексей, Дзæуджыхъæуы ахуырады управленийы хицау: «Кæд фарон мах заказ скодтам, ахуырæн сæрмагонд чингуытæ, уæд уыцы сын ацы аз Уæрæсейы Федерацийы ахуырады министрад разыйы дзуапп нал радта. Уымæ гæсгæ сæвзæрд зын уавæр».
Уавæр сраст кæнынæй горæт зæрдæ вæры 2- 3 къуыримæ. Фæлæ сæ хъуыдымæ гæсгæ, иуæй-иу чингуытæ хыгъдæй ист куы нæ рцыдаиккой, уæд, гæнæн ис, æмæ хъуыддаг афтæ нæ рауадаид. Ахуырады министрады зæгъынц, мин æмæ æрдæг чиныджы федералон номхыгъдмæ кæй нæ бацыдысты, уый. Фæлæ сæ закъонмæ гæсгæ нырма пайда кæнæн ис 5 азы. Ног чингуыты тыххæй та зæгъынц, хъуыддаг иууылдæр бынæттон администрациты къухы кæй ис, уый.
Цопанаты Маринæ, РЦИ-Аланийы ахуырады министрады хайады хицауы хæстæ æххæстгæнæг: «Ахуырады министрад фæрæзтæ радта бынæттон бюджеттæм. Уымæ гæсгæ сæхæдæг хъуамæ балхæдтаиккой ахуырадон æрмæг. Закъонмæ гæсгæ, хъуамæ ахуырадон фæрæзтæн сæ 75% хардзгонд æрцыдаиккой чингуытыл, фæлæ бирæ ахуыргæнæндæтты разамонджытæ, уæлдайдæр та Дзæуджыхъæуы, сæ хæс нæ сæххæст кодтой».
Республикæйы парламенты мæт та у, цæмæй ахæм уавæры скъолатæ фидæны мауал бахауой.
Таболты Тамарæ, РЦИ-Аланийы наукæйы, ахуырады, культурæ æмæ информацион политикæйы комитеты сæрдар: «Дыууæ азы хицауад сфидар кæны уынаффæ, лæвар чингуыты тыххæй. Фæлæ уæддæр, цавæрдæр аххосæгтæм гæсгæ, ныййарджытæ æлхæнынц чингуытæ».
Таболты Тамарæйы хъуыдымæ гæсгæ, скъолатæ афоныл чингуытæй кæй нæ сифтонг кодтой, уымæн ма ис æндæр аххосæгтæ дæр. Ис дзы скъолаты директорты рæдыд дæр, стæй администрацитæ дæр æххæстæй кæ нæ бакуыстой, уый, уæдæ рауагъдадтæ дæр алы хатт æмбæлгæ куыст нæ бакæнынц.
Цалынмæ бæрнон куыстуæтты хъуыддаг æвзарынц, уæдмæ та уал ныййарджыты хъæуы сæхи æхцайæ чингуытæ æлхæнæн. Зæгъæм, 10-æм къласæн физикæйы чиныг 400 сомæй асламдæрæй нæ балхæндзынæ. Уый та сеппæты бон нæу.
Касаты Наира
