филиал вгтрк государственная телерадиовещательная компания “Алания”

40 азы сабитимæ. Республикæйы сывæллæтты сфæлдыстадон галуан кадджын уавæры сæмбæлд йæ бæрæгбоныл. Йæ хъомылгæнинæгтæ бацæттæ кодтой зæрдæмæдзæугæ номыртæ, равдыстой дзы сæ техникон æнтыстдзинæдтæ.

Ахæм музыкæйы зæлтæм – ничи бауромдзæн йæхи. Бæрæгбоны цины нкъарæнтæ, хъæлдзæг худт, арфæйы ныхæстæ. Сывæллæтты сфæлдыстады республикон галуаны юбилей йæ разамонæг Гуыцмæзты Аннæйæн куыд хи гуырæн бон, афтæ у. 40 азы, зæгъæн ис, у йæ хæдзар. Алы сывæллон та йæхи хъæбул. У йын зынаргъ. Æмæ зæрдиагæй хъахъхъæны ацы хъомылгæнæндоны традицитæ.

Гуыцмæзты Аннæ, сывæллæтты сфæлдыстады республикон галуаны директор: «Ныртæккæ рæзты къахыл лæуд стæм. Бирæ ивддзинæдтæ цæуы нæ куысты. Уæдæ йæ алчидæр æмбары, æнæ уæлæмхасæн ахуырадæй рæсугъд, удыхъæдæй фидар, цымыдисаг адæймаг кæй не схъомыл кæндзынæ. Æмæ мах дæр кусæм, æххæст кæнæм нырыккон программæтæ, фæлварæм ног методикæтæ. Уыцы иу рæстæг ивгъуыд азты сæхи хорзæй чи равдыста, уыдон нæ рох кæнгæйæ. Нæ иумæйаг хæс та у баххуыс кæнын сывæллонæн йæ курдиат раргом кæнын, цымыдис æм цы кæсы, уыцы фæндагыл æй раст сæвæрын, баххуыс ын кæнын сфæлдыстадон кæнæ техникон куысты уæлахизтæм тырнын».

Ам 150 ахуыргæнæджы лæппуты æмæ чызджыты ахуыр кæнынц наукæ, аивад, спорт æмæ æндæр дæсныйæдтыл. 40 азмæ галуанæй рацыд бирæ сабитæ. Йæ рæстæджы ардæм цыд республикæйы хицауады сæрдары хæдивæг Челæхсаты Рустем дæр. Куыд радзырдта, афтæмæй йæ ахуыр кодтой къамтæ исыныл. Ацы бон стыр бузныг загъта йæ ахуыргæнджытæн, Республикæйы сæргълæууæджы номæй арфæйы фыстæг радта Галуаны директор Гуыцмæзты Аннæйæн. 

Бæрæгбонмæ сабитæ бацæттæ кодтой зæрдæмæдзæугæ номыртæ, равдыстой дзы сæ техникон æмæ сфæлдыстадон æнтыстдзинæдтæ: аив зæрдæмæдзæугæ концерт, æрмдæсныты хуыздæр куыстытæ, æнахуыр роботтæ æмæ цымыдисаг авиамодельтæ. 

Мерденты Изабеллæ, сывæллæтты сфæлдыстады республикон галуаны методист: «Абон мах нæ бæрæгбонмæ æрбакодтам чидæриддæр ацы галуанмæ йæ цæст дары, уыдоны. Не `рдхæрдты, галуаны æрдхæрдты. Æмæ уыдоны фæрцæй абон ам ис бæрæгбон. æмæ канд Галуаны бæрæгбон нæу, фæлæ Ирыстоны сывæллæтты бæрæгбон у. æмæ нæ кæстæртæ амондджын куыд уой, сæ фæндтæ сæ къуыхы куыд æфтой. Мах та Хуыцау ахæм арфæ ракæнæт æмæ нæ бон бирæ азты кæстæртимæ кусын куыд уа æмæ сæ раст фæндагыл нæ бон æвæрын куыд уа».

Ныртæккæ галуаны алы секциты æмæ къорды архайынц 4 000 сывæллонæй фылдæр. Цæгат Кавказы у æппæтæй стырдæр сывæллæтты хъомылгæнæндон.

Республикæйы сфæлдыстадон галуанæн ис хъæздыг истори. Ууыл дзурæг сты галуаны музейы æвдисæнтæ. 40 азмæ архайдта бирæ конкурсты æмæ иу сси уæлахиздзау. Суанг ма уæлæмхасæн ахуырады кусæндæтты хсæн Æппæтуæрæсеон конкурсы нымад æрцыд хуыздæрыл. Ууыл дзурынц сæ бирæ кады гæххæттытæ дæр.