Ныридæгæн сæ спайда кодтой 300 медицинон кусæджы
Республикæй дарддæр æххæстгонд цæуынц программæтæ «Хъæуккаг дохтыр» æмæ «Хъæуккаг фельдшер». Ныридæгæн сæ спайда кодтой 300 медицинон кусæджы. Ацы аз сæ архайджытæ суыдзысты 24 дохтыры æмæ 2 специалисты астæуккаг къабазæй. Бæлвырддæр радзурдзæн Чехойты Фатимæ.
Уырымты Георгий ивгъуыд аз сси программæ «Хъæуккаг дохтыр»-ы архайæг, æмæ райдыдта кусын Æрыдоны районы рынчындоны. Фæлтæрддзинад æм ис. 9 азы кусы дохтырæй. Æрыдойнаг кæй у, стæй районы рынчындоны дохтыр-онколог æхсызгон кæй хъуыдис, Георгийы уымæ гæсгæ бафæндыд программæйы архайæг суæвын.
Дохтыры дæсныйад æмæ нырыккон технологитæ стыр ныфс сты рынчынтæн. Æрыдоны районы медицинон куыстуат ифтонг у æппæт техникон фæрæзтæй. Уыдоны руаджы рагацау рабæрæг кæнæн ис онкологон низтæ. Уыдонæй ныртæккæ Георгий арæхстджынæй пайда кæны.
Республикæйы дарддæр æххæстгонд цæуынц программæтæ «Хъæуккаг дохтыр» æмæ «Хъæуккаг фельдшер». Ныридæгæн сæ спайда кодтой 300 медицинон кусæджы. Ацы аз сæ архайджытæ суыдзысты 24 дохтыры æмæ 2 специалисты астæуккаг къабазæй.
Дохтыртæ райсдзысты 1 милуан сомы, фельдшæртæ та – 500 мин сомы. Бадзырдмæ гæсгæ программæйы архайджытæ сæрмагонд медицинон куыстуаты хъуамæ фæллой кæной 5 азы. Фæлæ афтæ рауайы, æмæ контракт куы фæвæййы, уæддæр сæ фылдæр баззайынц уыцы бынæтты кусгæйæ.
