Кæстæртæн сарæзтой нырыккон уавæртæ физкультурæ æмæ спортæй архайынæн
Республикæйы 6 скъолайы ацы аз бындуронæй сцалцæг кодтой спортивон залтæ. Кæстæртæн сарæзтой нырыккон уавæртæ физкультурæ æмæ спортæй архайынæн. Æппæт куыстытæ цæуынц, национ проект «Ахуырад» æххæст кæнгæйæ. Бæстыхæйттæн баивтой сæ сæртæ, пъолтæ, рудзгуытæ æмæ дуæрттæ, сног кодтой хъармгæнæн системæ.
Ахуырадон пъланмæ гæсгæ, æнæниздзинадæн пайдахæссæг спортивон фæлварæнтæ, уый фæстæ та хъæлдзæг хъазт. Нартыхъæуы скъолайы спортивон залы ныр парахатæй сæхи ирхæфсынц сабитæ. Цалдæр мæйы размæ ацы уаты фыр къуындæгæй, иумæйагæй иу къласы сабитæ дæр нæ цыдысты. Уæдæ йæ мидфæлысты уавæр дæр зæрдæхсаинаг уыд. Йæ пъолы фæйнæджытæ бамбыдысты.
Ног спортзалы ныридгæн арæх фембæлынц спортивон клуб «Олимп»-ы хъомылгæнинæгтæ дæр. Уый дæр байгом ацы аз. Сабитæ, фæсурокты, сæхи фæирхæфсынц волейболæй хъазгæйæ, фæлтæрынц рог атлæтикæйы, стæй туризмы. Суанг ма ирон кæфтытæ дæр ахуыр кæнынц. Клубы, скъоладзаутимæ иумæ, зæрдиагæй архайынц хъæуы алы кары цæрджытæ дæр.
Национ проекты æххуысæй тагъд рæстæджы сног уыдзæн Рæмонтыхъæуы
скъолайы спортивон зал дæр. Кæд раздæр скъоладзауты ахуыртæ цыдысты уазал æмæ
уымæл бæстыхайы, уæд ныр се нæниздзинады райрæзтæн алы фадæттæ дæр арæзт æрцæудзæн.
Црауы скъоладзаутæн ацы уавæртæ сты, нырма уал, бæллиццаг. Скъолайы спортзал 40 азы дæргъы цалцæггонд нæ уыд. Нæй дзы дзаумæттæ раивæн уат дæр.
Хæстæгдæр дæууæ азы национ проект «Ахуырад»-ы æххуысæй бындурон цалцæггонд æмæ спортивон æххуысгæнæн фæрæзтæй ифтонг хъуамæ арцæой 14 хъæуккаг спортзалы. Ацы скъолайы дæр бæллынц уыцы номхыгъдмæ бахауынмæ.
