Æххæст æй кæны сывæллæтты туризмы центр
Республикæйы 6 скъолайы райдыдта æвзонг гидты ахуыр кæныны проект. Æххæст æй кæны сывæллæтты туризмы центр. 8-æм, 9-æм, 10-æм кълæсты ахуырдзауты ахуыр кæндзысты аттестацигонд экскурсоводтæ. Рæзгæ фæлтæрæн фæкæнынц рацæугæ практикон ахуыртæ. Курс ахæсдзæн 7 мæйы. Кæронбæттæны скъоладзаутæ ратдзысты фæлварæн æмæ райсдзысты квалификаци «Гиды æххуысгæнæг». Бæлвырддæр радзурдзæн Хъайтмазты Дзерассæ.
Экскурси цæмæй райдайы? Картæйæ, маршрутæй, фæлæ арæхдæр та – хуымæтæг дзаумæттты тыххæй афтæ цымыдисагæй радзурын кæй бон у, цæмæй та уазджыты æрыздæхын бафæнда, ахæм адæймагæй. Æппæт ацы лыстæг хабæрттыл ныр ахуыр кæнынц Цæгат Ирыстоны скъоладзауты. Республикæйы 6 ахуыргæнæндоны райдыдта гидты æххуысгæнджыты цæттæ кæныны курс – зонындзинæдты æмæ практикæйы 7 мæйы. 8-æм, 9-æм, 10-æм кълæсты ахуырдзаутæн хуымæтæг урочытæ не сты, фæлæ уарзон Ирыстоны традициты, таурæгъты æмæ культурæйы дунемæ фæндагмонджытæ суæвыны гæнæн. Алика Хачатрянæн фыццаг ахуыртæ тынг фæцыдысты йæ зæрдæмæ. Куыд зæгъы, афтæмæй нæ зыдта, ацы дæсныйад ахæм парахт кæй у, уый.
Райдайгæ гидтæн урокмæ дзæнгæрæг азæлдзæн бæстæйы 5 регионы. Цæгат Ирыстон фыццæгты æмрæнхъ. Дæсныйады сусæгдзинæдтæ рæзгæ фæлтæрæн амондзысты фæлтæрдджын гидтæ. Кæронбæттæны уыдзæн фæлварæн. Скъоладзаутæ хъуамæ æрхъуыды кæной авторон экскурси, æмæ йæ сæххæст кæной.
Сывæллæттæн радзырдтой абон экскурсоводы дæсныйад куыд парахат у, уый тыххæй дæр, йæ хицæндзинæдты тыххæй. Экскурситы дуне алывæрсыг у, зæгъы ахуырадон программæйы разамонæг Дзæгъойты Сергей. Парахатдæр кæнынц театралон æмæ промышленнон маршруттæ. Цалынмæ иу гидтæ республикæйы уазджыты Дзæуджыхъæуы историон хаимæ фæзонгæ кæнынц, уæдмæ инæттæ туристтæн гом кæнынц театрты фæскулисæтæ æмæ ма суанг равдисынц, металл кæм æмæ куыд равзæры, уый.
ФÆСКАДРЫ: Ахуырадон проекты архайы Дзæуджыхъæуы 5 скъолайы, æмæ иу та Æрыдоны. Ахуыргæнæндæтты ныридæгæн аразынц ахуырты фæтк. Архайджытæ бафыстой æмгуыстады бадзырдтæ дæр сывæллæтты туризмы республикон центримæ. Аразджытæ куыд зæгъынц, афтæмæй ахсджиаг у гидты ног фæлтæр хъомыл кæнын. Хъуамæ зоной Цæгат Ирыстоны историйы тыххæй бæлвырд æмæ цымыдисагæй радзурын.
