Байгом сты фарон Цæгат Ирыстоны сæргълæууæг Сергей Меняйлойы хъæппæрисæй
Республикæйы ахадгæйæ кусынц инженерон кълæстæ. Байгом сты фарон Цæгат Ирыстоны сæргълæууæг Сергей Меняйлойы хъæппæрисæй. Бæлвырд наукæтимæ йæ цард сбæттын кæй фæнды, уыцы сывæллæттæн æххуыс кæнынц фидæны дæсныйадимæ базонгæ уæвынæн. Теоретикон зонындзинæдтæ ахуырдзаутæ исынц сæхи скъолаты, практикæ та сæм вæййы хæххон-металлургон институты. Бæлвырддæр хабæрттæ радзурдзæн Хъайтмазты Дзерассæ.
Ацы сæрмагонд пецы тайын кæнынц алюминий. Гимназ «Диалог»-ы ахуырдзаутæ схæццæ кæнынц компоненттæ, реакцимæ цæст дарынц æмæ ахуыр кæнынц техникон процессимæ архайын. Хæххон-металлургон институты лабораториты скъоладзаутæ æрмæст æрзæт нæ тайын кæнынц, исынц ног пайдайаг зонындзинæдтæ дæр.
Ныртæккæ скъоладзаутæ зонгæ кæнынц, студенттæн цы практикон æрмæг нысангонд у, уыимæ. Инженерон кълæстæ хорз гæнæн сты, фидæны бæлвырд наукæтимæ йæ цард сбæттын кæй фæнды, уыдонæн. Зæгъæм, Сосранты Самирæ ныридæгæн зоны исын æвзист æмæ ма суанг сыгъзæрин дæр. Ацы хъуыддаджы йын æххуыс кæнынц фæлтæрдджын педагогтæ.
Инженерон кълæстæ дих кæнынц рагпрофилон æмæ профилонтыл. Профилонты ахуыр кæнынц скъоладзаутæ, 10-æм къласæй райдайгæйæ. Сæйраг хæс у, сывæллæттæн баххуыс кæнын фидæны дæсныйад равзарын. Теори ахуырдзаутæ исынц сæхи скъолаты, институты та сын вæййы практикон ахуыртæ, дæсныйадæвдисæг ахуыртæ, фæхъахъхъæнынц проекттæ.
Цæгат Ирыстоны инженерон кълæстæ кусын райдыдтой фарон Сергей Меняйлойы хъæппæрисæй. Архайынц республикæйы 30 скъолайы.
